खेडमध्ये पाच लहान मुले कोरोनाबाधित

खेड : तालुक्यातील सुसेरी गावात २ ते १४ वयोगटातील ५ लहान मुले कोरोनाबाधित झाल्याचा प्रकार शनिवारी रात्री उघडकीला आला. तालुक्यातील कोरेगाव ग्रामीण रुग्णालयाच्या कार्यक्षेत्रात येणाऱ्या सुसेरी क्रमांक १ या गावातील एकाच वाडीतील ५ लहान मुलांना कोरोनाची बाधा झाल्यानंतर तालुका आरोग्य यंत्रणा सावध झाली आहे. ग्रामीण भागात लहान मुले कोरोनाबाधित झाल्याने प्रशासनासमाेर चिंता वाढली आहे़

सुसेरी क्रमांक १ येथील एका कुटुंबातील पती -पत्नी हे कोरोनाबाधित सापडल्याने त्यांच्या कुटुंबातील उर्वरित सदस्यांची अँटिजन तपासणी करण्यात आली हाेती. त्यामध्ये पाच लहान मुले बाधित सापडली आहेत. यामध्ये एक मुलगी तर ५, ७, ९ व १४ वयाची मुले आहेत. या पाचही मुलांना प्रशासनाने खेड शहरातील शिवतेज कोविड सेंटरमध्ये उपचारासाठी दाखल केले आहे. याबाबत अधिक माहिती देताना कोरेगाव ग्रामीण रुग्णालयाचे डॉ. नितीन मोरे यांनी सांगितले की, या पाचही लहान मुलांना कोणत्याही प्रकारची लक्षणे नसून, त्यांची प्रकृती स्थिर आहे. डेल्टा प्लसच्या अनुषंगाने या पाच मुलांची पुढील तपासणी आरोग्य विभाग करणार का? हे पाहणे महत्त्वाचे आहे. कोरेगाव प्राथमिक आरोग्य केंद्रांतर्गत गावांमध्ये सध्या ६६ रूग्ण कोरोनाबाधित असून, त्यातील २५ रूग्ण गृह अलगीकरणात असून, उर्वरित ३५ रूग्ण संस्थात्मक विलगीकरणात आहेत. गेल्या मार्च महिन्यापासून या प्राथमिक आरोग्य केंद्रांतर्गत ६ रूग्णांचा मृत्यू झाला आहे तर आरोग्य केंद्रांतर्गत ३,५०६ जणांचे लसीकरण करण्यात आले आहे.

-------------------------

ही मुले बाधित झाली, याचा अर्थ लगेच जिल्ह्यात तिसरी लाट आली, असे म्हणता येणार नाही. घरातील आई, वडील बाधित झाल्यामुळे ही मुले बाधित झाली आहेत. त्यांना कोरोनाची खूपच सौम्य लक्षणे होती. आता ही मुले उपचारानंतर चांगली आहेत. नागरिकांनी घाबरुन न जाता शासकीय निर्देशांचे पालन करावे़

- डॉ. किरण पाटील, तालुका आरोग्य अधिकारी

--------------------------

कुटुंबातील कर्त्या पुरुषाला कोरोनासदृश्य लक्षणे दिसू लागल्यानंतर त्याने शहरातील एका खासगी दवाखान्यात उपचार सुरू केले होते. हा रुग्ण घरातच उर्वरित कुटुंबातील सदस्यांबरोबर घरात राहत होता. त्यामुळे या कुटुंबातील या लहान मुलांना संसर्ग झाला असावा, अशी शक्यता व्यक्त करण्यात येत आहे.