संगमेश्वरातील गडनदी धरण पूर्ण क्षमतेने भरले

देवरूख : संगमेश्वर तालुक्यातील गडनदी धरण पूर्ण क्षमतेने भरले आहे़ धरणाची संचय क्षमता १२६.१५ मीटर असून, पाणी पातळी १२१.२० मीटर एवढी आहे़ ०५ सेंमी उंचीने पाणी वाहत असून, विसर्ग ४१.०९२ घनमीटर आहे़ गडनदी धरणातून १८ जून रोजी सकाळी ११ वाजता सांडव्याद्वारे पाणी नदीपात्रात जाण्यास सुरुवात झाली, अशी माहिती गडनदी प्रकल्प कुचांबे उपविभागाचे उपविभागीय अभियंता संजय सोनावणे यांनी दिली. शेतकऱ्यांनी नदीपात्रात उतरु नये व स्वतःसह जनावरांची काळजी घेण्याचे आवाहन राजीवली ग्रामपंचायतीचे उपसरपंच संतोष येडगे यांनी यावेळी केले आहे.

रत्नागिरी जिल्ह्यातील सर्वांत मोठा गडनदी मध्यम पाटबंधारे प्रकल्प हा येथील शेतकऱ्यांना वरदान ठरू पाहत आहे़ धरणात क्षमतापूर्ण पाणीसाठा झाला असून, सांडव्याद्वारे पाणी नदीपात्रात जाण्यास सुरुवात झाली आहे़ त्यामुळे स्थानिकांमध्ये कुतूहलाचा विषय बनला आहे़, तर प्रकल्प सध्या पर्यटकांचे आकर्षण ठरत आहे. सध्या गडनदी धरण क्षेत्रात पावसाला जोर असून, ११ जून रोजी सकाळी ११ वाजेपर्यंत एकूण ५० मिलिमीटर पावसाची नोंद करण्यात आली आहे, तर एकूण ५७५ मिलीमीटर पावसाची नोंद झाली आहे़ त्यामुळे गडनदी धरण पाहायला जाणाऱ्यांनी धरणात उतरु नये़, तसेच सांडव्याच्या पाणीप्रवाहात शिरण्याचा प्रयत्न करू नये, असे आवाहन उपविभागीय अभियंता संजय सोनावणे यांनी केले आहे.