चाकाळे येथे मामाचा भाच्यावर काेयत्याने हल्ला

खेड : दारूच्या पैशासाठी पत्नीला काेयत्याने जिवे मारण्याचा प्रयत्न करणाऱ्या पतीला राेखणाऱ्या भाच्यावरच हल्ला केल्याची घटना खेड तालुक्यातील चाकाळे येथे १४ राेजी दुपारी ३ वाजता घडली. या घटनेत भाचा पंकज वाडकर जखमी झाला आहे. याप्रकरणी खेड पोलीस स्थानकात गुन्हा दाखल करण्यात आला आहे.

खेड पोलिसांनी दिलेल्या माहितीनुसार, तालुक्यातील चाकाळे हनुमाननगर येथे दि. १४ रोजी सायंकाळी उमेश सदानंद उतेकर (४५, रा. हनुमाननगर, चाकाळे) हा पत्नी सुमतीकडे दारू पिण्यासाठी पैसे मागत होता. तिने पैसे नसल्याचे सांगितल्याने उमेश याला राग आला व त्याने शिवीगाळ करत कोयत्याने जिवे मारण्याची धमकी देऊ लागला. या प्रकाराने घाबरलेली सुमती घराबाहेर पळाली. तेव्हा तेथे उभा असलेला तिचा मुलगा ओमकार व भाचा पंकज वाडकर यांनी उमेश याला रोखण्याचा व समजावण्याचा प्रयत्न केला. त्याचवेळी उमेश याने पंकज याच्यावर कोयत्याने हल्ला केला. यामध्ये पंकजच्या डाव्या डोळ्यावर गंभीर दुखापत झाली. त्याला तातडीने रुग्णालयात उपचारासाठी दाखल करण्यात आले. या घटनेची माहिती सुमती हिने खेड पोलीस स्थानकात दिल्यानंतर उमेश विरोधात पोलिसांनी गुन्हा दाखल करून त्याला अटक केली. न्यायालयासमोर हजर केले असता त्याला जामिनावर मुक्त करण्यात आले आहे. याप्रकरणी अधिक तपास पोलीस करत आहेत.