ज्येष्ठ नागरिकांसाठी फिरते लसीकरण केंद्र सुरु

रत्नागिरी : ६५ वर्षांवरील ज्येष्ठ नागरिक व दिव्यांगासाठी लसीकरण सुलभ व्हावे, म्हणून जिल्हा परिषद आरोग्य विभाग आणि रत्नागिरीतील उद्योजक सौरभ मलुष्टे यांच्या संयुक्त विद्यमाने फिरते लसीकरण केंद्र सुरू करण्यात आले आहे. या लसीकरण केंद्राचे उद्घाटन जिल्हा परिषद अध्यक्ष विक्रांत जाधव यांच्या हस्ते गुरूवारी करण्यात आले.

यावेळी जिल्हा परिषद उपाध्यक्ष उदय बने, अतिरिक्त मुख्य कार्यकारी अधिकारी नंदिनी घाणेकर, जिल्हा आरोग्य अधिकारी डॉ. बबिता कमलापूरकर, उद्योजक सौरभ मलुष्टे, समाजकल्याण सभापती परशुराम कदम, महिला बालकल्याण सभापती भारती सरवणकर, तालुका आरोग्य अधिकारी महेंद्र गावडे उपस्थित होते. सामाजिक कार्याचा वसा घेतलेले सौरभ मलुष्टे यांनी ही संकल्पना व जबाबदारी स्वीकारण्याची तयारी दाखवली़ व जिल्हा परिषदेच्या मुख्य कार्यकारी अधिकारी डॉ. इंदुराणी जाखड व आरोग्य सभापती उदय बने यांनी या संकल्पनेला तत्काळ मंजुरी दिली होती.

रत्नागिरी शहरातील विविध भागात जाऊन ही लसीकरण व्हॅन ज्येष्ठ नागरिकांना आणि दिव्यांगाना लसीकरण सुविधा उपलब्ध करून देणार आहे. कोविडचा सामना खऱ्या अर्थाने करायचा असेल तर लसीकरण हा प्रभावी उपाय आहे. ज्येष्ठ नागरिकांचे लसीकरण विनासायास पार पडावे, या तळमळीने उद्योजक सौरभ मलुष्टे मागील अनेक दिवसांपासून काम करत आहेत. लसीकरण केंद्रावर जाण्यासाठी मलुष्टे यांनी मोफत रिक्षाचीही व्यवस्था केली होती. ज्येष्ठांना लसीकरण सुविधा विनासायास मिळावी, यासाठी जिल्हा आरोग्य विभागाने सौरभ मलुष्टे यांच्या संयुक्त विद्यमाने हा उपक्रम सुरू केला आहे. लसीकरणासाठी ऑनलाईन बुकिंग ज्येष्ठांसाठी खूप अडचणीचे होते, त्यातूनही या उपक्रमामुळे ज्येष्ठांना दिलासा मिळणार आहे. त्यामुळेच हा उपक्रम लसीकरण प्रक्रिया वाढीसाठी मदतीचा ठरणार आहे.

-----------------------

रत्नागिरी जिल्ह्यातील ज्येष्ठ नागरिक व दिव्यांगांचे लसीकरण हाेण्यासाठी जिल्हा परिषद व उद्याेजक साैरभ मलुष्टे यांच्या संयुक्त विद्यमाने फिरते लसीकरण केंद्र उपक्रम हाती घेण्यात आला आहे. या उपक्रमाचे उद्घाटन जिल्हा परिषद अध्यक्ष विक्रांत जाधव यांच्या हस्ते करण्यात आले. यावेळी जिल्हा परिषद उपाध्यक्ष उदय बने, साैरभ मलुष्टे, डाॅ. बबिता कमलापूरकर व अन्य उपस्थित हाेते. (छाया : तन्मय दाते)