आंबा घाटात ट्रक दरीत कोसळून एक ठार, दोन जखमी

लोकमत न्यूज नेटवर्क

साखरपा : पावस (ता. रत्नागिरी) येथून मलकापूर येथे चिरे घेऊन जाणारा ट्रक संगमेश्वर तालुक्यातील रत्नागिरी-कोल्हापूर महामार्गावरील आंबाघाटातील २०० फूट खोल दरीत पलटी झाला. हा अपघात रविवारी रात्री ८ वाजण्याच्या दरम्यान झाला असून, अपघातात एकजण ठार तर दोघे जखमी झाले.

देवरुख पोलीस स्थानकातून मिळालेल्या माहितीनुसार ट्रक (एमएच ०९ बीसी ७२४१) ही चिऱ्याने भरलेली गाडी पावस ते मलकापूर अशी जात होती. आंबाघाटातील रस्त्याचा अंदाज न आल्याने ट्रक २०० फूट खोल दरीत कोसळला. यामध्ये सचिन पाटील (३३) हा जागीच ठार झाला तर अन्य दोघेजण गंभीर जखमी झाले असून जखमींना आंबा प्राथमिक आरोग्य केंद्रात दाखल करण्यात आले. हा अपघात रविवारी रात्रीच्या सुमारास झाल्याने मृतदेह व जखमींना दरीतून बाहेर काढण्यास साखरपा पोलिसांनी मोठी कसरत केली. मात्र जखमींची नावे समजू शकली नाहीत.

यावेळी देवरुख पोलीस स्थानकाचे पोलीस निरीक्षक मारुती जगताप यांच्या मार्गदर्शनाखाली पोलीस उपनिरीक्षक विद्या पाटील, पोलीस हेड कॉन्स्टेबल संजय मारळकर व सर्व पोलीस कर्मचारी यांनी घटनास्थळी जाऊन जखमी व मृतदेह बाहेर काढण्यासाठी परिश्रम घेतले. अपघाताचा तपास पोलीस उपनिरीक्षक विद्या पाटील, अंमलदार संजय मारळकर करत आहेत.