परिचारिकेवर लैंगिक अत्याचार करणारा पाेलिसांच्या ताब्यात

लाेकमत न्यूज नेटवर्क

चिपळूण : शहरातील भोगाळे या गजबजलेल्या परिसरात २४ वर्षीय परिचारिकेवर लैंगिक अत्याचार करून फरार झालेल्या नराधमाला पकडण्यात चिपळूण पाेलिसांना यश आले आहे. पाेलिसांनी एका २३ वर्षीय तरुणाला खेड तालुक्यातील लवेल येथून रविवारी रात्री अटक केली आहे. अवघ्या तीन दिवसात चिपळूण पोलिसांनी या आरोपीला पकडल्याने त्यांच्या या कामगिरीबद्दल कौतुक करण्यात येत आहे.

चार दिवसांपूर्वी शहरातील भोगाळे परिसरात एका २४ वर्षीय परिचारिकेवर लैंगिक अत्याचार झाल्याची घटना घडली होती. या घटनेनंतर अत्याचार करणारा नराधम पसार झाला होता. त्याचा शोध घेण्यासाठी दोन पथके तयार करण्यात आली हाेती. पोलिसांच्या हाती मध्यवर्ती बसस्थानक व भोगाळे येथील दीपक लॉजसमोरील सीसीटीव्ही फुटेज लागले होते. पीडित तरुणीने वर्णन केल्याप्रमाणे एक तरुण त्यामध्ये कैद झाला होता. संबंधित तरूणाच्या हालचाली व चालण्याच्या पद्धतीवरून पोलीस त्याचा शोध घेत होते. याचवेळी दुसऱ्या पथकाने पीडित तरुणीचा मोबाईल व छत्री घटनास्थळावरून गायब झाल्याने त्या मोबाईलचे लोकेशन तपासले. ते लोकेशन खेड तालुक्यातील सात्विनगाव व लवेल दरम्यान आढळले.

पोलिसांनी लवेलच्या दिशेने तपास सुरू केला. यावेळी एका व्यक्तीने ताे एक व्यावसायिक असल्याचे सांगून त्याला ओळखले. त्यानुसार पाेलिसांनी त्याच्याकडे काही बोगस गिऱ्हाईक पाठवून त्या तरूणाच्या हालचाली व आवाज टिपला. तीनवेळा अशा पद्धतीने प्रयोग केल्यानंतर पोलिसांची खात्री पटली व अखेर रविवारी रात्री त्याला अटक केली. त्याला सोमवारी न्यायालयात हजर करत न्यायालयीन कोठडीत रवानगी केली आहे. त्याप्रमाणे त्याची लवकरच ओळख परेड होणार आहे. संबंधित नराधमाला तत्काळ अटक केल्याबद्दल उपविभागीय पोलीस अधिकारी सचिन बारी, पोलीस निरीक्षक देवेंद्र पोळ, पोलीस उपनिरीक्षक समद बेग व त्यांच्या पथकाचा आमदार भास्कर जाधव, आमदार शेखर निकम, शिवसेना जिल्हाप्रमुख सचिन कदम यांनी सत्कार केला. यावेळी आमदार जाधव यांच्यासोबत फैयाज शिरळकर, रवींद्र कदम, आल्हाद वरवाटकर उपस्थित होते.

-------------------

विवाहित आणि आठ महिन्यांची मुलगी

या नराधमाला आठ महिन्यांची मुलगीही आहे. घटनेच्या दोन दिवस आधी तो तीन हजार रुपये घेऊन घराबाहेर पडला होता. त्यानंतर मुंबई एस. टी.ने पनवेल येथे गेला होता. पुन्हा मुंबई येथून तो बसने गुरुवारी दुपारी चिपळुणात आला. सायंकाळी तो बसस्थानकाच्या आवारात फिरत होता. त्यानंतर त्याने संबंधित पीडित तरुणी रस्त्याने एकटी जात असताना तिच्यावर लैंगिक अत्याचार केला.