एस. टी. बस - दुचाकी अपघातात एक जण ठार, दोघे जखमी

खेड : मुंबई - गोवा महामार्गावर कशेडी घाटाच्या पायथ्याशी गुहागर - मुंबई एस. टी. बस व दुचाकी यांची समोरासमोर धडक होऊन दुचाकी चालक ठार, तर दोघे जखमी झाले आहेत. हा अपघात २३ मार्च रोजी मध्यरात्री साडेअकरा वाजण्याच्या सुमारास झाला. विजय प्रकाश जाधव असे या मृत दुचाकी चालकाचे नाव आहे.

गुहागर आगाराचे चालक दत्ताराम बाळकृष्ण महाडिक (४५) एसटी बस (एमएच २० बी एल १५७४) घेऊन दिनांक २३ रोजी गुहागरहून मुंबईला जात होते. रात्री साडेआठ वाजता कशेडी घाटाच्या पायथ्याशी हॉटेल अनुसयासमोर मुंबईहून खेडला येणाऱ्या दुचाकीसोबत (एमएच ०८ एयु १७७९) त्यांची धडक झाली. यात दुचाकी चालक विजय जाधव (२१, उतेकरवाडी - चोरवणे) हा जागीच गतप्राण झाला तर रोहित रंगराव जाधव (२०, भरणे, खेड) व तुषार दीपक जाधव (२१, उतेकरवाडी, चोरवणे) हे दोघे गंभीर जखमी झाले.

अपघाताची माहिती मिळताच खेडचे पोलीस उपनिरीक्षक सोमनाथ कदम कशेडी पोलीस टॅबचे एस. बी. बोरकर, समीर सुर्वे, पी. एस. दाभोलकर, मृत्युंजय दूत पथकाचे मुकुंद मोरे, महेश रानडे, सहदेव कदम यांनी नरेंद्र महाराज संस्थानच्या रुग्णवाहिकेने जखमींना कळंबणी उपजिल्हा रुग्णालयात उपचारासाठी दाखल केले. या अपघाताची नोंद खेड पोलीस ठाण्यात दाखल करण्यात आली असून, अधिक तपास खेड पोलीस करीत आहेत.

..........................

खेड फोटो 241 मुंबई गोवा महामार्गावर कशेडी घाटाच्या पायथ्याशी एसटी बस व दुचाकी यांची समोरासमोर धडक झाली.