देवरुखच्या उपनगराध्यक्षपदी सान्वी संसारे बिनविराेध

देवरुख : महाराष्ट्र नवनिर्माण सेनेच्या नगरसेविका सान्वी सागर संसारे यांची देवरुख नगर पंचायतीच्या उपनगराध्यक्षपदी शुक्रवारी बिनविरोध निवड करण्यात आली आहे.

देवरुख नगर पंचायतीची निवडणूक भाजप आणि महाराष्ट्र नवनिर्माण सेनेने युती करून लढविली होती. निवडणुकीत मनसेलाही उपनगराध्यक्षपद देण्याचे भाजपने मान्य केले होते. पहिल्या टर्मला भाजपने दोन्ही पदे आपल्याकडेच ठेवली होती. त्यानंतर उपनगराध्यक्ष पद मनसेला देण्याचे निश्चित करण्यात आले हाेते. त्यामुळे उपनगराध्यक्ष सुशांत मुळ्ये यांनी राजीनामा दिला हाेता. त्यानुसार ही निवडणूक घेण्यात आली.

त्यानुसार शुक्रवारी घेण्यात आलेल्या निवडणुकीत संसारे यांची निवड करण्यात आली. देवरुखच्या पहिल्या लोकनियुक्त महिला नगराध्यक्ष म्हणून मृणाल अभिजीत शेट्ये या काम पाहत आहेत. आता संसारे यांची उपनगराध्यक्ष पदी निवड झाल्याने देवरुखच्या कारभाराची सूत्रे महिलांच्या हाती गेली आहेत.