महिलेच्या गळ्यातील मंगळसूत्र हिसकावले

रत्नागिरी : शहरातील राजीवडा नाका येथे महिलेला तसेच तिच्या मुलाला अज्ञात कारणातून शिवीगाळ व मारहाण केल्याची घटना शुक्रवारी रात्री ८.३० वाजण्याच्या दरम्यान घडली. या मारहाणीत महिलेच्या गळ्यातील सोन्याचे १९ ग्रॅम वजनाचे सुमारे २८ हजार रुपयांचे मंगळसूत्र हिसकावल्याची तक्रार देण्यात आली आहे. याप्रकरणी शहर पाेलिसांनी दोघांविरोधात गुन्हा दाखल केला आहे.

याप्रकरणी परवीन दालिम शेख (३३, रा. कौशल्य प्लाझा, राजीवडा नाका) यांनी शहर पोलिसांकडे तक्रार दिली आहे. या तक्रारीनुसार

फैजान रियाज फणसोपकर व अब्दुला इक्बाल वस्ता (दोन्ही रा. राजीवडा) यांच्या विराेधात गुन्हा दाखल करण्यात आला आहे. फैजान रियाज फणसोपकर व अब्दुला वस्ता यांनी परवीन शेख राहत असलेल्या इमारतीच्या खाली आले. त्यांनी त्यांचा मुलगा तेहबीज दालिम शेख (१५) याला मारहाण करण्यास सुरुवात केली. ही बाब परवीन शेख यांना समजताच त्या सोडवण्यासाठी खाली गेल्या व संशयित त्यांच्या मुलाला बाजूच्या पडक्या इमारतीत नेऊन मारहाण करत होते. मुलाला सोडवण्याचा प्रयत्न केला असता संशयितांनी त्यांनाही लाथाबुक्यांनी मारहाण केली. तसेच त्यांना ठार मारण्याची धमकी देत गळ्यातील सोन्याचे मंगळसूत्र हिसकावून घेतले. याबाबत परवीन शेख शनिवारी दुपारी शहर पोलिसांकडे तक्रार दिली. पुढील तपास पोलीस उपनिरीक्षक मुक्ता भोसले करीत आहेत.