सुधाकर कुरूप यांचे निधन

लांजा : शहरातील अजातशत्रू व्यक्तिमत्त्व असलेले लांजा गावचे प्रमुख मानकरी तसेच लांजा पंचक्रोशी विविध कार्यकारी सहकारी संस्थेचे चेअरमन सुधाकर ऊर्फ भाई कुरूप (६८) यांचे अल्पशा आजाराने निधन झाले.

सुधाकर कुरूप यांनी लांजा तालुका काँग्रेस पक्षाचे तालुकाध्यक्ष म्हणून अनेक वर्षे काम केले. लांजा विविध कार्यकारी सहकारी संस्थेचे व्हाइस चेअरमन म्हणून १० वर्षे, तर विद्यमान चेअरमन म्हणून २० वर्षे कार्यरत होते. लांजा शहरातील ते प्रमुख मानकरी असल्याने त्यांचे एक वेगळे आदराचे स्थान होते. लांजामध्ये सर्व जाती, धर्मांतील लोकांशी जिव्हाळ्याचे संबंध होते. गावातील लोकांचा ते न्यायनिवाडा करीत असल्याने लोकांचा फार विश्वास त्यांनी संपादित केला होता. लांजा तालुक्यातील सर्वच राजकीय पक्ष त्यांचा आदर करीत असत.

गेले दोन महिने अल्पशा आजाराशी ते झुंज देत होते. अखेर,

शुक्रवारी सकाळी त्यांची प्राणज्योत मालवली. त्यांच्या निधनाचे वृत्त लांजा शहरात समजताच अनेकांनी त्यांच्या निवासस्थानी जाऊन कुटुंबाचे सांत्वन केले.

रात्री उशिरा लांजा शहरातील कनावजेवाडी येथील स्मशानभूमीत त्यांच्या पार्थिवावर अंत्यसंस्कार करण्यात आले. त्यांच्या पश्चात तीन मुलगे, पत्नी, भाऊ, बहिणी, सुना, नातवंडे असा परिवार आहे.