स्वप्नाली सावंत खून प्रकरण: घराच्या हॉलमध्ये गणपती अन् बेडरूममध्ये केला खून

रत्नागिरी : घराच्या हाॅलमध्ये गणपतीची प्रतिष्ठापना केली होती आणि बेडरूममध्ये सुकांत सावंतने पत्नी स्वप्नालीचा गळा दाबून खून केल्याची खळबळजनक माहिती पोलिसांच्या तपासात पुढे आली आहे. गेले काही दिवस जिल्ह्यात गाजणाऱ्या या खून प्रकरणातील अनेक मुद्दे पोलीस अधीक्षक डॉ. मोहितकुमार गर्ग यांनी बुधवारी पत्रकार परिषदेतून पुढे आणले.

स्वप्नाली सावंत बेपत्ता झाल्याची तक्रार पती सुकांत सावंत यांनी २ सप्टेंबरला दिली होती. मात्र, पती-पत्नीच्या वादाच्या पार्श्वभूमीवर स्वप्नालीचा घातपात झाला असावा, अशी तक्रार स्वप्नालीची आई संगीता कृष्णा शिर्के यांनी ११ सप्टेंबरला दिली. सुकांत सावंत, रूपेश ऊर्फ छोटा भाई सावंत व पम्या ऊर्फ प्रमोद गावणंग या तिघांनी मिळून स्वप्नालीला ठार मारल्याचे सुकांतने स्वतःच आपल्याला सांगितल्याचे त्यांनी तक्रारीत नमूद केले. त्यावरून खुनाचा गुन्हा दाखल झाला आणि तपासाला दिशा आली.

संशयित आरोपी सुकांत सावंत वेगवेगळी माहिती देऊन पोलिसांची दिशाभूल करीत होता. वर्षभर खुनाचा कट रचून सर्व पुरावे नष्ट करण्याचे नियोजन केले होते. त्याप्रमाणे सर्व घडत गेले. मात्र, पोलिसांना घराच्या जवळच थोडीशी राख आणि मृतदेह जाळलेल्या ठिकाणी ८ ते १० मानवी अस्थी सापडल्या आणि त्यातून अनेक धागे जुळत गेले. खून घराच्या आवारातच झाल्याचे आणि मृतदेह तेथेच जाळल्याचे त्यातून निष्पन्न झाले.

मृतदेह लपवला

हा गणेशोत्सव आपल्यासाठी शेवटचा आहे, याची पुसटशी कल्पनादेखील स्वप्नालीला नव्हती. तिची हत्या करून तिचा मृतदेह गवतात लपवण्यात आला. सूर्यास्तानंतर त्याने मृतदेहाची विल्हेवाट लावण्याचा निर्णय घेतला. दोन साथीदारांना सोबत घेत मृतदेहाची विल्हेवाट लावली.

पेंढ्यावर मृतदेह पेटवला

या मृतदेहाची विल्हेवाट लावायची कशी? याचा विचार करून शेवटी बंगल्याच्या मागील बाजूस कोबा केलेल्या भागात गवत टाकण्यात आले. या गवतावर मृतदेह ठेवून पुन्हा मृतदेहावर गवत टाकले. गवतावर पेट्रोल ओतून मृतदेह पेटवून दिला.