अंगणवाडी सेविकांना शिकवा ना इंग्लिश

रहिम दलाल

लोकमत न्यूज नेटवर्क

रत्नागिरी : केंद्र शासनाने अंगणवाडी सेविकांसाठी पोषण ट्रॅकर हे ॲप विकसित केले आहे. या ॲपमध्ये अंगणवाडी सेविकांना दररोज माहिती भरणे बंधनकारक आहे. ही सर्व माहिती इंग्रजीमधून भरावी लागत आहे. काही अंगणवाडी सेविकांचे शिक्षण सातवी ते दहावीपर्यंत आहे. त्यामुळे अंगणवाडी सेविकांना माहिती इंग्रजीतून भरताना अडचणीचे ठरत आहे. रत्नागिरी जिल्हा डोंगराळ असून, अनेक गावांमध्ये मोबाईलवर इंटरनेट सेवा उपलब्ध होत नाही. त्यामुळे या ॲपचा इंटरनेट नसलेल्या ठिकाणच्या अंगणवाड्यांना काहीही उपयोग होत नाही.

पोषण ट्रॅकर ॲपचा वापर कसा करावा, यासाठी अंगणवाडी सेविकांना प्रशिक्षण देण्यात आले आहे. काही अंगणवाडी सेविकांचे शिक्षण कमी असल्याने त्यांना माहिती भरण्यासाठी मराठीतून फॉरमॅट देण्यात आलेला आहे. त्यानुसार ॲपमध्ये माहिती भरण्यासाठी सुपरवायझर मदत करत असतात.

- योगेश जवादे, जिल्हा कार्यक्रम अधिकारी, महिला बालकल्याण समिती, जिल्हा परिषद.

पोषण ट्रॅकर ॲप हे इंग्रजीमधून आहे. मराठीतून माहिती भरण्यासाठी या ॲपमध्ये तसा बदल करण्यात यावा, अशी मागणी संघटनेकडून आयुक्तांकडे करण्यात आली आहे. त्यासाठी संघटनेतर्फे निवेदनही देण्यात आले आहे.

- संगीता आंबेरकर, तालुकाध्यक्ष,

अंगणवाडी कर्मचारी संघटना

पोषण ट्रॅकर ॲपमध्ये इंग्रजीतून माहिती भरता येत नसल्याने मराठी फॉरमॅट देण्यात आलेला आहे. तो अंगणवाडी सेविका भरतात. त्यानंतर महिन्यातून दोनवेळा होणाऱ्या गट बैठकीवेळी त्या फॉरमॅटवरुन सुपरवायझरच्या मदतीने मोबाईलवर ऑनलाईन माहिती भरण्यात येते.

माेबाईलची अडचण वेगळीच

पोषण ट्रॅकर ॲपमध्ये सर्व माहिती इंग्रजीमधून भरावी लागत आहे. त्याचबरोबर रत्नागिरी जिल्ह्याचा ग्रामीण भाग हा डोंगराळ असल्याने इंटरनेट सेवा मिळत नाही. अशावेळी खूप अडचणीचे ठरत आहे. तसेच मोबाईलची व्हॅलिडिटी संपलेली आहे. त्यामुळे अनेकदा हा मोबाईल हँग होत असल्याने माहिती भरताना त्रास होता. त्याचबरोबर अनेकदा मोबाईलमध्ये बिघाड होत असल्याने जिल्हा कार्यालयाकडे दुरुस्तीसाठी दिला जातो. आतापर्यंत २४८ मोबाईल नादुरुस्त झाले होते. त्यापैकी ९० टक्के मोबाईल दुरुस्त करण्यात आले. उर्वरित १० टक्के मोबाईल अजूनही दुरुस्त झालेले नाहीत.

पाेषण ट्रॅकवरील कामे

पोषण ट्रॅकरमध्ये नवजात बालकांपासून ते चार वर्षांपर्यंतच्या बालकांची माहिती, गरोदर माता, स्तनदा माता यांची माहिती तसेच त्यांना दिला जाणारा पोषण आहार आदींची माहिती इंग्रजी भाषेत भरावी लागते. ही माहिती भरण्याची पद्धत किचकट व इंग्रजीमधून असल्याने अंगणवाडी सेविका हैराण झाल्या आहेत.