भाेस्ते घाटात जांभा दगड भरलेल्या ट्रकचा अपघात; चालक बचावला

खेड : मुंबई-गोवा राष्ट्रीय महामार्गावरील भोस्ते घाटात मुंबईच्या दिशेने जांभा चिरे घेऊन जाणाऱ्या ट्रकच्या चालकाचे नियंत्रण सुटल्याने झालेल्या अपघातात चालक जखमी झाला. हा अपघात ७ जून रोजी सकाळी ६़ ३० वाजण्याच्या सुमारास घडला.

घटनास्थळावरून मिळालेल्या माहितीनुसार, गुहागर येथून रायगड जिल्ह्यातील रोहा येथे जांभा चिरे घेऊन जाणारा ट्रक (एमएच ०४, एफपी २२४६) भोस्ते घाटात विरुद्ध बाजूने उतरत हाेता. घाटातील एका तीव्र स्वरूपाच्या उतारावर चालकाचा ट्रकवरील ताबा सुटला आणि ट्रक रस्त्याच्या मध्यभागी असलेल्या दुभाजकावर धडकला. या अपघातात ट्रकचे मोठ्या प्रमाणात नुकसान झाले असून, सुदैवाने चालक बचावला. अपघाताचे वृत्त समजताच, पोलीस नाईक संदीप कदम, वाहतूक पोलीस नंदू घाणेकर, सचिन जाधव, होमगार्ड विशाल गोगेकर, पोलीस मित्र आशिष धावन घटनास्थळी दाखल झाले. त्यानंतर, एकेरी वाहतूक सुरू करून वाहतूककोंडी सोडवली.

--------------------------------

खेड तालुक्यातील भोस्ते घाटात झालेल्या अपघातात ट्रकचे नुकसान झाले.