लांजात रेल्वे पुलाच्या भिंतीला ट्रक आदळून सांगलीच्या दाेघांचा मृत्यू

लांजा (जि. रत्नागिरी) : रेल्वे पुलाच्या भिंतीला ट्रक आदळून झालेल्या अपघातात चालकासह क्लिनरचा जागीच मृत्यू झाला. हा अपघात लांजा तालुक्यातील कुरचुंब-तळवडे मार्गावर तळवडे येथे साेमवारी रात्री ८:३० वाजण्याच्या दरम्यान झाला. भरधाव वेगाने जात असताना उतारात वाहनावर नियंत्रण न राहिल्याने हा अपघात झाल्याचा प्राथमिक अंदाज आहे.

चालक कमलाकर भागप्पा केंगार (२८, रा. आसंगी तुर्क-पांडोझरी, जत, सांगली) आणि क्लिनर कमलाकर शिवराम जेजगे (१७, रा. जाडरबाेबलाड, जत, सांगली) अशी मृत्यू झालेल्या दाेघांची नावे आहेत. कमलाकर केंगार हा चिरे भरून ट्रक (केए- २८, डी- ५३१२) घेऊन सापुचेतळे येथून चिरा भरून सोमवारी सायंकाळी निघाला होता. 

लांजा येथून आसगे मार्गे दाभोळे रस्त्याने जात असताना तळवडे येथील उतारात चालकाचा ट्रकवरील ताबा सुटला. त्यामुळे ट्रक कुरचुंब-तळवडे येथे असलेल्या कोकण रेल्वे पुलाच्या भिंतीला धडकला. ही धडक इतकी जबरदस्त हाेती की, ट्रकच्या दर्शनी भागाचा चक्काचूर झाला. या अपघातात चालक कमलाकर केंगार व क्लिनर कमलाकर जेजगे यांचा जागीच मृत्यू झाला.