तांत्रिक बाबींमुळे गुहागर ग्रामीण रुग्णालयातील व्हेंटिलेटर बंद

लाेकमत न्यूज नेटवर्क

असगोली : गुहागर ग्रामीण रुग्णालयाला व्हेंटिलेटर मशीन उपलब्ध करून देण्यात आले आहे. मात्र, हे मशीन अद्याप कार्यान्वितच करण्यात आले नसल्याची बाब उघड झाली आहे. याबाबत युवा सेनेच्या पदाधिकाऱ्यांनी वैद्यकीय अधीक्षक डाॅ. जयंत दाभाेळे यांची भेट घेऊन माहिती घेतली. त्यावेळी तांत्रिक बाबींमुळे व्हेंटिलेटर मशीन सुरू झाले नसल्याची माहिती देण्यात आली.

गुहागर शहरातील ग्रामीण रुग्णालयाला व्हेंटिलेटर मशीन उपलब्ध झाले आहे. मात्र, अद्याप हे मशीन कार्यान्वित का झालेले नाही तसेच रुग्णालयातील परिचारिका विभाग कोरोना कक्षापासून दूर आहे. त्यामुळे ऑक्सिजन लावलेल्या रुग्णांचे निरीक्षण करण्यासाठी तेथे परिचारिकाच नसतात. अन्य रुग्णांची तब्येत अचानक बिघडली तर कक्षाबाहेर थांबलेल्या नातेवाईकांना परिचारिकांना बोलावण्यासाठी धावपळ करावी लागते. या साऱ्या विषयांवर युवा सेनेच्या पदाधिकाऱ्यांनी यावेळी चर्चा केली़. यावेळी युवा सेना तालुकाप्रमुख अमरदीप परचुरे, युवा सेना शहरप्रमुख राकेश साखरकर, शाखाप्रमुख कल्पेश बागकर, ग्राहक संरक्षण कक्षाचे आदेश मोरे, ऋषी कचरेकर आणि प्रतीक साखरकर उपस्थित हाेते.

व्हेंटिलेटरच्या प्रश्नाबाबत बाेलताना डॉ. दाभोळे म्हणाले की, हे मशीन उपलब्ध झाले आहे. मात्र, हे मशीन सुरु करण्यासाठी केवळ ऑक्सिजन सिलिंडरला पाईप जोडून भागत नाही तर स्वतंत्र उच्चदाबाची ऑक्सिजन वाहून नेणारी पाईपलाईन आवश्यक असते. ही पाईपलाईन बसविण्यासाठी वैद्यक विभागातील ऑक्सिजन पुरवठ्याचे काम करणाऱ्या अभियंत्यांची गरज असते. त्या संदर्भात आम्ही जिल्हा शल्य चिकित्सकांकडे पत्रव्यवहार करताना आणखी ५ व्हेंटिलेटर जोडता येतील, अशी पाईपलाईन बसविण्यास सांगितले आहे. त्यानुसार अभियंत्याने येऊन पाहणी केली आहे. आता जिल्हा शल्य चिकित्सकांकडून पुढील कार्यवाही झाल्यावर हे काम पूर्ण होईल, असे त्यांनी सांगितले.

परिचारिका कक्षाबाबत डॉ. दाभोळे म्हणाले की, थेट कोरोना विभागात परिचारिका कक्ष उभारणे थोडे धोक्याचे आहे. तरीही कोरोना विभागाजवळ स्वतंत्र खोलीत परिचारिकांची व्यवस्था करणे शक्य आहे. त्याबाबतची कार्यवाही करता येईल.

यावेळी पाईपलाईन बसविण्यासाठी किंवा परिचारिका कक्ष बदलण्यासाठी मनुष्यबळाची आवश्यकता असेल तर हक्काने सांगा. युवा सेनेचे कार्यकर्ते ही कामे करण्यासाठी आपल्याला मदत करतील, असे आश्वासन डॉ. दाभोळे यांना देण्यात आले.

-------------------

गुहागर ग्रामीण रुग्णालयातील अडचणींबाबत युवा सेनेच्या पदाधिकाऱ्यांनी वैद्यकीय अधीक्षक डाॅ़. जयंत दाभाेळे यांची भेट घेऊन चर्चा केली.