लॉकडाऊनमुळे धबधबे ओस; पर्यटकांच्या आनंदावर विरजण

लोकमत न्यूज नेटवर्क

खेड : पावसाला सुरूवात हाेताच डोंगररांगामध्ये नैसर्गिक झरे प्रवाहित होऊ लागतात. शहरापासून अवघ्या दहा किलाेमीटरवर असलेल्या जामगे, शिवतर येथे पावसाळ्यात अनेकांची पावले याठिकाणच्या धबधब्यांचा आनंद लुटण्यासाठी वळतात. मात्र, गेल्या दोन वर्षात कोविडच्या पार्श्वभूमीवर असलेल्या लॉकडाऊनमुळे धबधब्यांवर जाण्यास बंदी घालण्यात आली आहे. त्यामुळे धबधबे ओस पडले आहेत.

तालुक्यातील खोपी शिरगावच्या डोंगरमाथ्यावर दिमाखात उभा असलेला रघुवीर घाट पर्यटकांसाठी पावसाळी पर्यटनाचे एक खास आकर्षण आहे. सातारा जिल्ह्याच्या सीमारेषेवर असलेला हा रखवालदार पर्यटकांना आकर्षित करतो. पावसाळ्यात एकदा तरी रघुवीर घाटात जायलाच हवे, या इराद्याने पर्यटक याठिकाणी दाखल हाेतात. एका बाजूला कोयना खोरे, घनदाट जंगल तर दुसऱ्या बाजूला डोंगरउतार असलेल्या रघुवीर घाटाचा काही भाग सह्याद्री व्याघ्र प्रकल्पात समाविष्ट झाला आहे. त्यामुळे या घाटाचे महत्त्व आणखी वाढले आहे.

पश्चिम घाटात समाविष्ट असलेल्या सह्याद्रीमध्ये अनेक औषधी वनस्पती व विविध प्रकारची जैवविविधता आहे. येथील घाटात फिरताना त्याची प्रचिती येते. रघुवीर घाटात अनेक लहान-मोठे धबधबे उंच कड्यावरून खाली काेसळतात. रघुवीर घाटात असे लहान-मोठे अनेक धबधबे लक्ष वेधून घेतात. या धबधब्यांत भिजण्याचा आनंद लुटल्याशिवाय पर्यटकांना राहवत नाही. याठिकाणी पर्यटनाचा आनंद लुटताना काळजी घ्यावी लागते. अनेकवेळा रस्त्यावर दरड येते किंवा झाडे कोसळलेली असतात. त्यामुळे सतर्क राहणे गरजेचे असते. रघुवीर घाटातील वाढत्या पर्यटकांसाठी एकमेव हॉटेल उपलब्ध आहे. धबधब्यांच्या पाण्यात मनमुरादपणे डुंबल्यानंतर पर्यटक पोटपूजेसाठी या हॉटेलमध्ये धाव घेतात. पावसाळ्यात पर्यटकांची गर्दी असली तरी उर्वरित कालावधीत तुरळक वर्दळ असल्याने याठिकाणी व्यवसाय वाढ झालेली नाही.