Waterfalls in Konkan: पर्यटकांना खुणावतोय सावडावचा धबधबा

धबधब्याजवळ पर्यटकांसाठी चेजिंग रूम, वॉश रूम आणि वाहनांसाठी पार्किंग व्यवस्था

- निकेत पावसकर, तळेरे -सिंधुदुर्ग

काेकणातील निसर्ग सौंदर्याची अनेकांना नेहमीच भुरळ घातलेली आहे. त्यामुळेच वर्षानुवर्षे पावसाळी आणि उन्हाळी पर्यटनासाठी असंख्य पर्यटक कोकणातील विविध स्थळांना भेट देऊन आनंद लुटतात. सध्या पावसाळी पर्यटनाला सुरुवात झाली असून, असंख्य ठिकाणचे धबधबे प्रवाहित झाले आहेत. त्यामुळे तो अवर्णनीय आनंद लुटण्यासाठी पर्यटक सुट्टीत मोठ्या प्रमाणात कोकणात येत आहेत. सध्या हे धबधबे पर्यटकांना खुणावत आहेत.

कोकणातील निसर्ग, धबधबे, समुद्र किनारे, किल्ले, विविध धार्मिक स्थळे हे सर्व अद्भुत आणि अद्वितीय असे पाहण्यासारखे दृश्य असंख्य पर्यटक आवर्जून पाहतात. जून महिना पूर्णतः तसा पाहिल्यास कोरडाच गेला. जुलै महिन्याच्या सुरुवातीपासून पावसाने जोर धरला आणि खऱ्या अर्थाने पावसाला सुरुवात झाली. सिंधुदुर्ग जिल्ह्यातील कणकवली तालुक्यातील मुंबई-गोवा महामार्गापासून जवळच असलेला सावडाव धबधबा पूर्ण क्षमतेने वाहू लागला आहे. त्यामुळे सुट्टीत पर्यटक या धबधब्याकडे मोठ्या संख्येने येऊ लागले असल्याचे चित्र आहे.

अल्पावधीत महाराष्ट्रासह परराज्यात प्रसिद्ध झालेला कणकवली तालुक्यातील निसर्गरम्य सावडाव धबधबा प्रवाहित होण्याची वाट पर्यटक पाहत असतात. यावर्षी पुन्हा वर्षा पर्यटन सुरू झाले असून, जिल्ह्यासह राज्य,  परराज्यातील पर्यटकांची उच्चांकी गर्दी आता सावडाव येथे दिसू लागली आहे. कणकवलीपासून अवघ्या १६ किमी अंतरावर तर मुंबई-गोवा महामार्गावरून ६ किमी अंतरावर असलेला सावडाव धबधबा अनेकांना आकर्षित करतोय. धबधब्याजवळील मोकळी प्रशस्त जागा सुरक्षितता यामुळे हा धबधबा आणि निसर्ग सौंदर्य सर्वांनाच मोहित करते.

यावर्षी मान्सून उशिरा सक्रिय झाला. मात्र, सावडाव परिसरात दमदार पडणाऱ्या पावसामुळे धबधबा प्रवाहित झाला आहे. वर्षा पर्यटनासाठी सावडावकडे शनिवार, रविवार वर्षा पर्यटकांची पावले वळू लागली आहेत. हिरवीगार झाडी, हिरव्यागार निसर्गरम्य वातावरणातून खळखळ वाहणारा धबधबा पाहताना पर्यटकांना अविस्मरणीय क्षण अनुभवायला मिळतो. जिल्ह्यातील आंबोलीनंतर वर्षा पर्यटनासाठी चांगला धबधबा असल्यामुळे जिल्ह्यासह इतर राज्यातून अनेक पर्यटक मोठ्या संख्येने सावडावला पसंती देतात. त्यामुळे दिवसेंदिवस गर्दी वाढत आहे.

या धबधब्याजवळ पर्यटकांसाठी चेजिंग रूम, वॉश रूम आणि वाहनांसाठी पार्किंग व्यवस्था करण्यात आली आहे. मात्र, विशेषतः सुट्टीच्या दिवसात पोलिस बंदोबस्त असेल तर सुरक्षिततेच्या दृष्टीने आणि उत्साही पर्यटकांना हाताळण्यासाठी सोयीचे होऊ शकेल. अनेकदा बेभान झालेल्या पर्यटकांना रोखणे शक्य होत नाही आणि त्यामुळे अनुचित प्रकार घडण्याचा संभव असतो.

डोंगर पठारावरून पसरट कड्यावरून खाली कोसळणारा, निसर्गरम्य वातावरणात आनंदाचे उधाणच आलेला सावडाव धबधबा कोसळू लागला आहे. त्यामुळे धबधब्याखाली अनेक पर्यटक स्नान करण्याचा आनंद लुटताना दिसत आहेत. यावर्षी जून अखेरपासून ते सप्टेंबर काळात सावडाव धबधब्यावर पर्यटकांची संख्या दररोज वाढण्याची शक्यता आहे. रविवार व सुट्टीच्या दिवसांसह अन्य दिवशीही पर्यटक वर्षा पर्यटनासाठी येथे हजेरी लावतात. या धबधब्याकडे जाणारा मार्ग अलीकडे रुंद केल्याने निसर्गाच्या कुशीतून सुखकर प्रवास करण्याचा आनंद मिळतो. स्थानिक ग्रामस्थांकडून मिळालेल्या माहितीनुसार सुट्टीच्या दिवशी किमान
२ ते ३ हजार पर्यटक या धबधब्याचा आनंद लुटण्यासाठी येतात. त्यामुळे इतर सुविधांच्या बाबतीत प्रशासनाने आणि शासनाने लक्ष देण्याची आवश्यकता आहे.

सावडावकडे असे जा

• कणकवलीवरून सावडाव धबधबा अवघ्या १६ किलोमीटर अंतरावर आहे. तर मुंबई-गोवा महामार्गावरील सावडाव फाट्यावरून अवघ्या ६ किलोमीटर अंतरावर हा धबधबा आहे.
• या धबधब्याकडे जायचे म्हणजे स्वतःच्या वाहनाशिवाय पर्याय नाही. अगदी आजूबाजूच्या निसर्गाचा अनुभव घेत या धबधब्याकडे जाता येते.

खासगी वाहन व्यवस्था

याठिकाणी सर्व जागा खासगी असल्याचे समजले. याच खासगी जागेत वाहने लावण्यासाठी वाहनतळ करण्यात आले आहे. त्यासाठी दुचाकीला २० रुपये आणि चारचाकी वाहनासाठी रुपये ४० असे शुल्क आकारले जाते. तर काही दुकानेही या परिसरात थाटलेली आहेत.

परजिल्ह्यातील सर्वाधिक पर्यटक

याठिकाणी दरवर्षी जिल्ह्यासह जिल्ह्याबाहेरील पर्यटकांची वाढती संख्या आहे. मात्र, अशा पर्यटन स्थळावर येणाऱ्या बेजबाबदार पर्यटकांच्या वागण्यामुळे अशा स्थळांच्या सुरक्षेसह सौंदर्याबाबतही प्रश्नचिन्ह निर्माण होताना दिसतो. पर्यटक मोठ्या संख्येने येतात, मात्र जाताना सर्व कचरा इतरत्र टाकलेला असतो. यासाठी त्याठिकाणी कडक अंमलबजावणी करण्यासाठी पोलिस बंदोबस्त ठेवला पाहिजे.