तिसऱ्या मजल्यावरुन पडून तरुणाचा मृत्यू

चिपळूण : शहरालगतच्या खेर्डी बाजारपेठेतील शुभम हाईटस् या इमारतीच्या तिसऱ्या मजल्यावरुन पडून तरुणाचा मृत्यू झाल्याची घटना मंगळवारी सकाळी ११.३० वाजण्याच्या सुमारास घडली. संकेत अशोक महादे (२५, खेर्डी बाजारपेठ ) असे मृत्यू झालेल्या तरुणाचे नाव आहे. या घटनेची पोलीस स्थानकात आकस्मिक मृत्यूची नोंद करण्यात आली आहे.

याबाबतची खबर त्याचा भाऊ संदेश अशोक महादे यांनी दिली आहे. पोलिसांनी दिलेल्या माहितीनुसार, संकेतला दारुचे व्यसन होते. दारुच्या नशेत असताना त्याचा तोल जाऊन शुभम हाईटस् या इमारतीच्या तिसऱ्या मजल्यावरुन तो खाली पडला. यावेळी त्याच्या डोक्याला गंभीर दुखापत झाल्याने त्याचा मृत्यू झाला. या घटनेची माहिती पोलिसांना मिळाल्यानंतर सहाय्यक पोलीस उपनिरीक्षक राजेंद्र देसाई, सहाय्यक पोलीस उपनिरीक्षक पी. एल. चव्हाण यांनी घटनास्थळी भेट दिली.