इस्लामपुरात १ लाख ५० हजारांची वीज चोरी उघडकीस

इस्लामपूर : शहरातील शिवनगर परिसरात वीज चोरी करणाऱ्या दोन ग्राहकांच्या घरावर छापे मारून वीज वितरण कंपनीच्या भरारी पथकाने १ लाख ५० हजार रुपयांची वीज चोरी उघडकीस आणली. या दोघांविरुद्ध पोलिसात चोरीसह विद्युत कायद्यानुसार गुन्हे दाखल करण्यात आले आहेत.

विजय मारुती मोरे आणि सचिन लक्ष्मण खोत (दोघे रा. शिवनगर) अशी त्यांची नावे आहेत. वीज वितरण कंपनीचे अतिरिक्त कार्यकारी अभियंता महेशकुमार श्रीरंग राऊत (सांगली) यांनी दोघांविरुद्ध फिर्याद दिली आहे. या दोघांनीही आपल्या घरातील वीज मीटरमध्ये फेरफार करून ही चोरी केल्याचे निष्पन्न झाले आहे.

विजय मोरे याच्या वीज मीटरची पथकाने तपासणी केली असता त्यामध्ये फेरफार केल्याचे दिसून आले. त्याच्याविरुद्ध दोन वर्षात १ लाख २४ हजार ३२० रुपये किमतीच्या ५ हजार ६३ युनिटची वीज चोरी केल्याचे स्पष्ट झाले. दरम्यान, पथकाने सचिन खोत याच्या घरातील मीटरची तपासणी केल्यावर त्यानेही मीटरमध्ये फेरफार करून २८ हजार ७१० रुपये किमतीची २ हजार १९१ युनिटची वीज चोरी केली होती. या दोन्ही कारवाया फेब्रुवारी महिन्यात करण्यात आल्या होत्या. त्यानंतर त्यांना तडजोडीसाठी कालावधी देऊनही त्यांनी वरील वीज चोरीची रक्कम न भरल्याने दोघांविरुद्ध गुन्हे दाखल करण्यात आले.