‘फिट इंडिया’त सांगली जिल्ह्यातील १८९६ शाळा ‘अनफिट’

सांगली : कोरोना काळात सर्वांच्याच शारीरिक क्षमतेचा कस लागला. प्रतिकार क्षमतेअभावी अनेकांचा कोरोनाने बळी घेतला. या पार्श्वभूमीवर केंद्र सरकारने फिट इंडिया मोहीम सुरू केली आहे. जिल्ह्यातून तिला मिळालेला प्रतिसाद मात्र अत्यंत निराशाजनक आहे. सुमारे २२२७ शाळांपैकी फक्त ३३१ शाळांनीच सहभाग नोंदविला आहे. खेळांकडे पाहण्याचा समाजाचा आणि शाळांचा दृष्टिकोन अत्यंत उदासीन असल्याचे यावरून स्पष्ट झाले आहे.

जिल्ह्यात पहिली ते बारावीच्या २ हजार २२७ शाळा आहेत. सर्वच शाळांनी फिट इंडियामध्ये सहभाग घेणे अपेक्षित आहे. प्रत्यक्ष परिस्थिती मात्र तशी नाही. फेब्रुवारीमध्ये मोहीम सुरू झाल्यानंतर क्रीडा व शिक्षण विभागाने तालुकानिहाय क्रीडाशिक्षकांच्या बैठका घेतल्या. योजनेची माहिती देऊन नोंदणीचे आवाहन केले. शिराळा, वाळवा आणि मिरज तालुक्यांनी त्यात रस दाखविला. मिरजेतून १०२, वाळव्यातून १२० आणि शिराळ्यातून १०९ शाळांनी नोंदणी केली. उर्वरित तालुक्यांतून मात्र अत्यल्प प्रतिसाद आहे. नोंदणीची मुदत २७ डिसेंबरपर्यंत आहे; पण तिला आणखी मुदतवाढीची शक्यता क्रीडा क्षेत्रातून व्यक्त करण्यात आली.

संपूर्ण नोंदणी ऑनलाईन स्वरुपात करायची आहे. त्यासाठी प्रत्येक शाळेला लिंक देण्यात आली आहे. लॉकडाऊन काळात नोंदणी सुरू झाली. नेमक्या याच काळात शाळा बंद होत्या. विद्यार्थी व क्रीडा शिक्षकांचा संपर्कच राहिला नाही. त्याचाही फटका फिड इंडियाला बसला. मुळात या उपक्रमाची सुरुवातच चुकीच्या वेळी झाल्याची प्रतिक्रिया क्रीडाशिक्षकांनी व्यक्त केली. शाळांमध्ये खेळांविषयी अत्यंत अनास्था असल्याचे फिट इंडिया मोहिमेमुळे पुन्हा एकदा अधोरेखित झाले. क्रीडा साहित्य वर्षानुवर्षे धूळ खात पडते. ते मुलांपर्यंत येतच नाही. सहायक शिक्षकच क्रीडाशिक्षक असतो. त्याला खेळ सोडून शाळेतील अन्य सर्व कामे लावली जातात. मूळ विषय बाजूलाच राहतो.

कोरोनामुळे शाळा बंद राहिल्या. त्याचा फटका फिट इंडियाच्या नोंदणीला बसला. शाळा व मुलांशी संपर्कच झाला नाही. योजनेचा प्रसारही परिणामकारक होऊ शकला नाही. आता शाळा सुरू होत असल्याने नोंदणी वाढण्याची अपेक्षा आहे. तंदुुरुस्त देशासाठी मोहीम महत्त्वाची आहे.

- प्रशांत पवार,

प्रशिक्षक

कोरोनामुळे शाळा बंद राहिल्या. त्याचा फटका फिट इंडियाच्या नोंदणीला बसला. शाळा व मुलांशी संपर्कच झाला नाही. योजनेचा प्रसारही परिणामकारक होऊ शकला नाही. आता शाळा सुरू होत असल्याने नोंदणी वाढण्याची अपेक्षा आहे. तंदुुरुस्त देशासाठी मोहीम महत्त्वाची आहे.

- प्रशांत पवार,

प्रशिक्षक

कोरोना लॉकडाऊन काळात फिट इंडियासाठी पूर्ण नोंदणी शक्य झाली नाही. तीन तालुक्यांतून क्रीडाशिक्षकांच्या कार्यशाळा घेऊन नोंदणीसाठी आवाहन केले होते. त्याला प्रतिसाद मिळाला. अजूनही नोंदणी सुरू आहे. जास्तीजास्त शाळांच्या सहभागासाठी आमचे प्रयत्न सुरू आहेत.

- माणिक वाघमारे,

जिल्हा क्रीडा अधिकारी.

-------