प्रभाग १६ च्या पोटनिवडणुकीसाठी २४ हजार मतदार

सांगली : माजी महापौर हारुण शिकलगार यांच्या निधनामुळे रिक्त झालेल्या प्रभाग १६ मधील जागेसाठी लवकरच पोटनिवडणूक होत आहे. या निवडणुकीसाठी महापालिका प्रशासनाच्यावतीने मंगळवारी प्रारूप मतदारयादी प्रसिद्ध केली. यात २४ हजार ५८३ मतदार असून, २३ फेब्रुवारीपर्यंत हरकती दाखल करण्याची मुदत आहे.

काँग्रेसचे नगरसेवक तथा माजी महापौर हारुण शिकलगार यांचे चार महिन्यांपूर्वी निधन झाले. त्यांच्या निधनाने रिक्त झालेल्या जागेसाठी पोटनिवडणूक होत आहे. त्यासाठी प्रारूप मतदारयादी प्रसिद्ध करण्यात आली. यात १२ हजार २४४ पुरुष व १२ हजार ३३९ महिला असे २४ हजार ५८३ मतदारांची यादी निश्चित केली आहे. महापालिका मुख्यालय, प्रभाग समिती एक व हिराबाग वाॅटर वर्क्स या ठिकाणी ही यादी प्रसिद्ध करण्यात आली आहे. त्यावर २३ फेब्रुवारीपर्यंत हरकती दाखल करण्याची मुदत आहे. सहायक आयुक्त सहदेव कावडे, प्रशासकीय अधिकारी अशोक माणकापुरे, शैलेश खोत, धनंजय कांबळे आदींनी मतदार यादी नोटीस बोर्डवर प्रसिद्ध केली.