Sangli: शिंदे गटाच्या दसऱ्या मेळाव्यास जाताना जखमी झालेल्या शिवसैनिकाचा उपचारादरम्यान मृत्यू

शिवसैनिकांच्या गाडीला दुधाच्या टँकरने दिलेल्या धडकेत एकजण जागीच ठार तर चौघे गंभीर जखमी झाले होते

घाटनांद्रे (जि.सांगली) : मुंबईतील दसरा मेळाव्यासाठी जात असताना शिरढोण (ता. कवठेमहांकाळ) येथे अपघातात जखमी झालेले ज्येष्ठ शिवसैनिक सुभाष लिंगाप्पा कुनुरे (वय ६०, रा. हिंगणगाव) यांची मृत्यूशी झुंज रविवारी थांबली. ३३व्या दिवशी त्यांचे निधन झाले.

शिंदे गटाच्या दसरा मेळाव्यासाठी जात असताना शिरढोण गावाजवळ दि. २४ ऑक्टोबर रोजी शिवसैनिकांच्या गाडीला दुधाच्या टँकरने धडक दिली. या अपघातात विवेक तेली हे जागेवरच ठार झाले होते, तर संदीप शिंत्रे, प्रसाद सूर्यवंशी, सुभाष कुनुरे, महेश देसाई हे चौघेजण गंभीर जखमी झाले होते. त्यांना सांगली येथील हॉस्पिटलमध्ये उपचारासाठी दाखल केले होते.

जखमींपैकी सुभाष कुनुरे यांच्यावर सांगलीतील सिव्हिल हॉस्पिटलमध्ये उपचार सुरू होते. रविवार, दि. २६ रोजी उपचार सुरू असताना ३३व्या दिवशी कुनुरे यांची प्राणज्योत मालवली. मृत कुनुरे यांच्या घरची परिस्थिती अत्यंत हलाखीची आहे.