नांदेडच्या विद्यार्थ्याची इस्लामपुरात गळफास घेऊन आत्महत्या, कारण अस्पष्ट

स्पर्धा परिक्षेच्या अभ्यासासाठी वास्तव्य

इस्लामपूर : नांदेड येथून स्पर्धा परीक्षेचा अभ्यास करण्यासाठी इस्लामपुरात आलेल्या २८ वर्षीय युवकाने राहत्या खोलीमध्ये स्लॅबच्या हुकाला दोरीने गळफास घेऊन आत्महत्या केली. ही घटना मंगळवारी दुपारी दीडच्या सुमारास उघडकीस आली. आत्महत्येचे नेमके कारण समजू शकले नाही.

अक्षय गोविंद राठोड (रा. नांदेड) असे आत्महत्या केलेल्या युवकाचे नाव आहे. तो येथील एका स्पर्धा परीक्षा केंद्रामध्ये अभ्यासासाठी आला होता. इतर तीन सहकाऱ्यांसमवेत तो शाहूनगर परिसरात वंजारी यांच्या खोलीमध्ये भाड्याने राहत होता.

दुपारी दीडच्या सुमारास जीवन रामचंद्र कस्तुरे (रा. शाहुवाडी, जि. कोल्हापूर) हा सहकारी खोलीवर आला. यावेळी खोलीच्या एका दरवाज्याला बाहेरून कुलूप होते. तर दुसरा दरवाजा आतून बंद होता. जीवन याने अक्षय याला हाका मारल्या. मात्र प्रतिसाद मिळाला नाही. त्यामुळे जीवन याने खिडकी बाजुला करून पाहिले असता अक्षयने गळफास घेतल्याचे दिसले.

जीवन याने अन्य मित्रांच्या मदतीने पोलिसांना घटनेची माहिती दिली. पोलिसांनी घटनास्थळी धाव घेत अक्षय राठोड याच्या नातेवाईकांना माहिती देत त्याचा मृतदेह उत्तरीय तपासणीसाठी उपजिल्हा रुग्णालयात पाठविला. हवालदार शरद बावडेकर अधिक तपास करीत आहेत.