येळदरीत अवैध दारु वाहतुकीवर कारवाई

शेगाव : येळदरी (ता. जत) येथे जत पोलिसांनी अवैध दारूची वाहतूक करणाऱ्या पिरगोंडा निगाप्पा कांबळे (वय २१, रा. बसर्गी) याला अटक केली आहे. त्याच्याकडील मद्यसाठ्यासह सुमारे ५० हजार २५० रुपयांचा मुद्देमाल जप्त केला आहे. शनिवारी रात्री आठ वाजता ही कारवाई करण्यात आली.

पाेलिसांचे पथक गस्तीवर असताना येळदरी येथे बेकायदेशीर दारूची वाहतूक केली जात असल्याची माहिती मिळाली हाेती. त्यानुसार शनिवारी रात्री ८ च्या सुमारास सहाय्यक पोलीस निरीक्षक गोपाल भोसले, पोलीस नाईक सचिन जौंजाळ, केरबा चव्हाण व होमगार्डच्या कर्मचाऱ्यांनी येळदरी गावात नाकाबंदी केली होती. दरम्यान, पिरगोंडा निगाप्पा कांबळे हा तरूण जत ते येळदरी या मार्गाने दुचाकी क्रमांक (एमएच १०, ८४२२)वरून दारू घेऊन जात असताना येळदरी बसस्थानकासमोर पोलिसांनी त्याला थांबवले. यावेळी पोलिसांनी तपासणी केली असता, त्याच्याकडे ५० हजार रुपयांचा मद्यसाठा सापडला. पोलिसांनी दुचाकीसह मद्यसाठा जप्त केला असून, कांबळेवर गुन्हा दाखल करुन त्याला अटक केली आहे.