सह्याद्री व्याघ्र राखीवमध्ये आणखी एका वाघाची नोंद

विकास शहा

शिराळा: सह्याद्री व्याघ्र राखीवमध्ये आणखी एका वाघाची नोंद झाली असून येथील वाघांची संख्या दोन झाली आहे. गतवर्षी, १७ डिसेंबर २०२३ रोजी सह्याद्री व्याघ्र राखीव अंतर्गत चांदोली वन्यजीव विभागामध्ये २०१८ नंतर प्रथमच वाघाची नोंद झाली. या वाघाचे नामकरण एसटीआर - टी १  करण्यात आले होते. 

क्षेत्रीय कर्मचारी वर्षभर या वाघाची दैनंदिन गस्ती, कॅमेरा ट्रॅपच्या माध्यमातून नियमित देखरेख करत आहेत. हा वाघ गेले वर्षभर सह्याद्री व्याघ्र प्रकल्पमध्येच वास्तव्य करून आहे. व्याघ्र प्रकल्पामध्ये वाघांसाठी अनुकूल अधिवास व भक्ष प्राण्यांची संख्या पुरेशी उपलब्ध असल्याचे यामुळे अधोरेखित झाले आहे.

सह्याद्री व्याघ्र भ्रमणमार्गातील वाघांवर अभ्यास करणारे संशोधक गिरीश पंजाबी यांच्याशी सल्लामसलत केले असता, असे लक्षात आले की, हा वाघ राधानगरी अभयारण्यामध्ये नोंद झाला होता. राधानगरी अभयारण्य मधून उत्तरेस भ्रमण मार्गावाटे जवळपास १०० कि.मी चा प्रवास करून या वाघाने आपला मुक्काम सह्याद्री व्याघ्र प्रकल्पमध्ये नोंद केला आहे.

सह्याद्री व्याघ्र राखीवचे क्षेत्रसंचालक रामानुजम, उपसंचालक चांदोली स्नेहलता पाटील, उपसंचालक कोयना किरण जगताप यांच्या मार्गदर्शनाखाली या नवीन वाघाचे नामकरण एसटीआर - टी २ असे करण्यात आले आहे. व्याघ्र प्रकल्प मध्ये सुरु असलेल्या उत्कृष्ट देखरेख व संरक्षण कामासाठी दोन्ही वाघांच्या झालेल्या नोंदीबद्दल क्षेत्रसंचालक रामानुजम यांनी सर्व क्षेत्रीय कर्मचारी व वन अधिकाऱ्यांचे अभिनंदन केले.

चांदोली राष्ट्रीय उद्यानमध्ये अधिवास देखरेखीसाठी लावण्यात आलेल्या कॅमेरा ट्रॅप मध्ये रात्री ११ वाजून ४६ मिनिटांनी वाघाचे काही फोटो नोंद झाले. गस्ती दरम्यान वाघाच्या पावलांचे ठसे देखील मिळाले. नोंद झालेले फोटो व्याघ्र प्रकल्पच्या 'टायगर सेल' या संशोधन विभागामध्ये तपासण्यात आले. फोटोंचे विश्लेषण केल्यानंतर संशोधन टीमला असे लक्षात आले की, हे फोटो पहिल्या वाघाचे नसून, एका वेगळ्याच वाघाचे आहेत. सुरक्षेसाठी ठिकाण स्पष्ट केलेले नाही. - नंदकुमार नलवडे, वनक्षेत्रपाल, चांदोली