भरधाव माेटारीची जीपला धडक; पाच जण जखमी

लोकमत न्यूज नेटवर्क

शिराळा : औढी (ता. शिराळा) येथे जीप व आलिशान माेटारीची समोरासमोर धडक होऊन पाच जण जखमी झाले. अपघातानंतर माेटारीचा चालक घटनास्थळावरून पसार झाला. या माेटारीमध्ये जिलेटिनच्या तीन कांड्या सापडल्या. याप्रकरणी विनापरवाना स्फोटके ठेवल्याबद्दल व अपघाताला कारणीभूत ठरल्याप्रकरणी संबंधित माेटारीच्या अज्ञात चालकाविरुद्ध शिराळा पोलीस ठाण्यात गुन्हा दाखल करण्यात आला आहे. हा अपघात सोमवार, दि. ५ रोजी रात्री ८ वाजता घडला.

जीप (क्र. एमएच ०४ क्यू ५९१८) ही करमाळेहून शिराळाकडे, तर आलिशान माेटार (क्र. एमएच ०१ वायए २४४९) शिराळाकडून करमाळेकडे निघाली होती. भरधाव माेटारीने वेगाने येऊन जीपला धडक दिली. धडक एवढी जोरात होती की, जीप रस्त्याच्या कडेला उलटली. जीपमधील फिर्यादी बबन बाळू पाटील, हणमंत मोहिते, राजाराम कदम, भानुदास माने, भगवान माने (सर्व रा. करमाळे, ता. शिराळा) हे पाच जण जखमी झाले. अपघातानंतर माेटारीचा चालक अंधाराचा फायदा घेऊन घटनास्थळावरून पळून गेला. सर्व जखमींवर खासगी रुग्णालयात उपचार सुरू आहेत.

अपघाताची माहिती मिळताच शिराळा पाेलिसांनी घटनास्थळी धाव घेतली. अपघातग्रस्त आलिशान माेटारीची तपासणी केली असता त्यामध्ये जिलेटिनच्या तीन कांड्या सापडल्या. याबाबत शिराळा पोलीस ठाण्यात अपघातास कारणीभूत ठरल्याबद्दल, तसेच विनापरवाना स्फोटके बाळगल्याबद्दल अज्ञात व्यक्तीविरुद्ध गुन्हा दाखल करण्यात आला आहे. तपास पोलीस उपनिरीक्षक अविनाश वाडेकर व सहायक उपनिरीक्षक कुमार वायदंडे करीत आहेत.