सांगलीत कमळ पक्षाच्या आगमनाने पक्षिप्रेमी आनंदले

सांगलीत श्यामरावनगरच्या दलदलीत आढळलेला कमळ पक्षी.

लोकमत न्यूज नेटवर्क

सांगली : शहरी रहिवासापासून दुरावलेला कमळ पक्षी सांगलीत मंगळवारी अचानक दिसला. श्यामरावनगरमधील दलदलीत किडे टिपताना पक्षिप्रेमींना त्याचे दर्शन झाले. सुमारे दहा वर्षांनंतर तो सांगलीत आढळल्याची माहिती पक्षी अभ्यासक ॲड. फिरोज तांबोळी यांनी दिली.

दलदलीची ठिकाणे कमी झाल्याने हा पक्षी शहरापासून दुरावला आहे. कृष्णेच्या काठावर कधी कधी दिसायचा; पण गेल्या दहा वर्षांत तो अचानक गायब झाला. गेल्या दोन वर्षांत श्यामरावनगरमध्ये पुराचे पाणी शिरून बरीच दलदल निर्माण झाली आहे. देशी व स्थलांतरित विदेशी पक्ष्यांसाठी ही दलदल म्हणजे अन्न मिळविण्यासाठीची हक्काची जागा ठरली आहे. ॲड. तांबोळी सहकाऱ्यांसमवेत तेथे पक्षी निरीक्षण करत असताना कमळ पक्ष्यांचा थवा दिसला. आठ ते दहा पक्षी गेल्या काही दिवसांपासून तेथे येत असावेत, असे तांबोळी म्हणाले. लांब शेपटीचा कमळ पक्षी अत्यंत देखणा व सभ्य पक्षी मानला जातो.