सांगलीवाडीच्या महिलेचा कृष्णा नदीत मृतदेह आढळला

सांगली : शुक्रवारपासून बेपत्ता असलेल्या सांगलीवाडीतील महिलेचा मृतदेह सांगलीत कृष्णा नदीवरील बंधाऱ्याजवळ शनिवारी आढळून आला. भारती बोडके असे तिचे नाव असून या महिलेची आत्महत्या की घातपात याबाबत पोलिसांनी शोध सुरू केला आहे. दरम्यान, सलग दुसऱ्या दिवशी कृष्णा नदीमध्ये महिलेचा मृतदेह आढळून आला आहे.

कृष्णा नदीवर सांगलीवाडीला जोडणारा कोल्हापुरी पद्धतीचा बंधारा आहे. या बंधाऱ्याजवळ नियमितपणे अनेकजण येत असतात. शनिवारी सकाळी काही तरुण पोहण्यासाठी गेल्यानंतर त्यांना एका महिलेचा मृतदेह पाण्यावर तरंगताना दिसला. त्यांनी तातडीने शहर पोलिसांना याबाबत माहिती दिल्यानंतर पोलिसांचे पथक घटनास्थळी दाखल झाले. स्पेशल रेस्क्यू फोर्स टीमच्या मदतीने मृतदेह पाण्याबाहेर काढला. पोलिसांनी केलेल्या तपासात भारती बोडके ही शुक्रवारपासून बेपत्ता असलेल्या महिलेचा हा मृतदेह असल्याचे तपासात स्पष्ट झाले. शासकीय रुग्णालयात शवविच्छेदनानंतर मृतदेह कुटुंबीयांच्या ताब्यात देण्यात आला. दरम्यान, बोडके यांनी आत्महत्या केली की घातपात याबाबत पोलिसांनी तपास सुरू केला आहे. शहर पोलीस ठाण्यात घटनेची नोंद आहे.

चौकट

सलग दुसऱ्या दिवशी दुसरा मृतदेह

शुक्रवारी सकाळीही खणभाग परिसरातील एका महिलेचा मृतदेह कृष्णा नदीत आढळून आला होता. शनिवारी सलग दुसऱ्या दिवशीही सांगलीवाडीतील महिलेचा नदीत मृतदेह आढळून आला आहे.