शेगावमध्ये सव्वालाखाचा गांजा जप्त

जत : शेगाव (ता. जत) येथील तानाजी जगन्नाथ शिंदे (वय ६२ रा. शिंदे मळा शेगांव) यांच्या गव्हाच्या शेतात स्थानिक गुन्हा अन्वेषण विभागाच्या पथकाने छापा टाकून १ लाख २९ हजार रुपये किमतीची २१ किलो ५०० ग्रॅम वजनाची लहान मोठी मिळून २५ ते ३० तयार गांजाची झाडे जप्त केली. ही कारवाई बुधवारी सायंकाळी सहा वाजण्याच्या सुमारास करण्यात आली. याप्रकरणी तानाजी शिंदे यास अटक करण्यात आली आहे.

स्थानिक गुन्हा अन्वेषण विभागाच्या पथकाने शेगांव ते गुळवंची रस्त्यावर शेगांवपासून दीड किलोमीटर अंतरावरील तानाजी शिंदे यांच्या गव्हाच्या शेतात अचानक छापा टाकला. यावेळी तयार गांजाची २५ ते ३० लहान मोठी झाडे आढळून आली. पाेलिसांनी ती जप्त केली. शिंदे यांनी घरासमोरील शेतात गव्हाची मळणी केली होती. परंतु गांजाची झाडे तशीच शेतात ठेवली होती. याची माहिती रस्त्यावरुन ये-जा करणाऱ्या नागरिकांना समजल्यानंतर त्यांनी पोलिसांना माहिती दिली होती. खात्री करून पोलिसांनी ही कारवाई केली. याप्रकरणी तानाजी शिंदे याच्या विरोधात जत पोलिसात गुन्हा दाखल करून त्यांना अटक करण्यात आली आहे. पुढील तपास जत पोलीस करत आहेत.