जिल्ह्यात कोरोनाचा कहर; नवे २३० रुग्ण

सांगली : जिल्ह्यात कोरोनाबाधितांच्या संख्येत सोमवारी विक्रमी संख्येने वाढ झाली. गेल्या पाच महिन्यांतील सर्वाधिक रुग्णांची नोंद होताना २३० जणांना कोरोनाचे निदान झाले. पलूस आणि वाळवा तालुक्यांतील दोघांचा मृत्यू झाला आहे. महापालिका क्षेत्रासह वाळवा, खानापूर तालुक्यात जास्त रुग्ण आढळून आले आहेत.

आठवड्यापासून जिल्ह्यातील कोरोनाबाधितांच्या संख्येतील वाढ चिंता वाढविणारी ठरत आहे. साेमवारी यात चारपटीने वाढ होत २३० जणांना निदान झाले. सांगलीत ३३, मिरजेत २३, तर वाळवा आणि खानापूर तालुक्यात प्रत्येकी ३१ रुग्ण आढळून आले आहेत. १९ जण कोरोनामुक्त झाले आहेत.

आरोग्य विभागाच्यावतीने आरटीपीसीआर अंतर्गत १३९५ जणांच्या नमुन्यांची तपासणी केली. त्यात १७२ जणांना कोरोनाचे निदान झाले, तर रॅपिड ॲन्टिजेनच्या ९३७ चाचण्यांमधून ६३ जण पॉझिटिव्ह आढळले आहेत.

उपचार घेणाऱ्या ७३ जणांची प्रकृती चिंताजनक असून, त्यातील ६४ जण ऑक्सिजनवर, तर ९ जण व्हेंटिलेटरवर उपचार घेत आहेत. सोलापूर, कोल्हापूर, सातारा जिल्ह्यांतील प्रत्येकी एकास, तर बेळगाव जिल्ह्यातील दोघांना कोरोनाचे निदान झाले आहे.

चौकट

उपचार घेणाऱ्यांची संख्या हजारावर

बाधितांची संख्या वाढत असतानाच उपचार घेणाऱ्यांच्या संख्येतही वाढ झाली आहे. आता १००३ जण उपचार घेत आहेत. होम आयसोलेशनमध्ये ८१३ जण असून ॲक्टिव्ह रुग्णांची संख्याही ९९४ झाली आहे.

चौकट

आतापर्यंतचे एकूण बाधित ४९,८५६

उपचार घेत असलेले १००३

कोरोनामुक्त झालेले ४७,०७८

आतापर्यंतचे एकूण मृत्यू १७७५

सोमवारी दिवसभरात

सांगली ३३

मिरज २३

वाळवा, खानापूर प्रत्येकी ३१

मिरज तालुका, जत प्रत्येकी २७

कडेगाव २१

आटपाडी १७

तासगाव ८

शिराळा, कवठेमहांकाळ प्रत्येकी ५

पलूस २