पद्माळेत कोरोनाग्रस्तांच्या उपचारांचा खर्च सरपंचांनी उचलला

संजयनगर : पद्माळे (ता. मिरज) येथील सरपंच सचिन जगदाळे सामाजिक बांधीलकी जपत स्वखर्चातून गावातील कोरोनाग्रस्त रुग्णांना उपचारासाठी लागणारी सर्व औषधे व रोगप्रतिकारशक्ती वाढविण्यासाठी ड्रायफ्रुट, अंडी स्व:खर्चातून देत आहेत. त्यांचे हे काम प्रेरक असून, इतर सरपंचांना त्यांनी आदर्श घालून दिला आहे. त्यांच्या या उपक्रमाचे गावातून नव्हे तर जिल्ह्यातून कौतुक होत आहे.

कोरोनाच्या दुसऱ्या लाटेने जिल्ह्यात थैमान घातले आहे. याचा सर्वाधिक फटका ग्रामीण भागाला बसत आहे. अनेक कुटुंबे कोरोनाच्या विळख्यात सापडत आहेत. त्यामुळे भीतीचे वातावरण आहे. मिरज तालुक्यातील पद्माळे गावाने पहिल्या लाटेचा यशस्वी मुकाबला केला. सध्या दुसऱ्या लाटेत येथे पंधरा कोरोनाबाधित रुग्ण असून, ते होम आयसोलेशनमध्ये उपचार घेत आहेत. ग्रामीण भागातील अनेक रुग्णांची घरची परिस्थिती बेताची असते. त्यामुळे रुग्ण औषधोपचारास टाळाटाळ करते; मात्र युवा सरपंच सचिन जगदाळे यांनी गावातील प्रत्येक रुग्णावर उपचार होऊन तो बरा झाला पाहिजे. हे ध्येय समाेर ठेवून यंत्रणा राबवली आहे. सध्या गावात पंधरा रुग्ण होम आयसोलेशनमध्ये उपचार घेत आहेत. या रुग्णांना लागणारी सर्व औषधे सरपंच सचिन जगदाळे स्वत: देत आहेत. शिवाय रोगप्रतिकारशक्ती वाढविण्यासाठी रुग्णांना आवश्यक असलेले खाद्यपदार्थ म्हणजे अंडी, काजू, बदाम, बेदाणे सरपंच जगदाळे स्वत: पुरवत आहेत. यामुळे रुग्णांना माेठा दिलासा मिळाला आहे. त्यांच्या या उपक्रमाचे सर्वत्र कौतुक हाेत आहे. गावातील मित्रमंडळीही त्यांच्या या कार्यात योगदान देत आहे.

चौकट

कोरोनामुक्त गावासाठी प्रयत्न

कोरोनाची दुसरी लाट धोकादायक आहे. यातून गावातील सर्व नागरिकांचा बचाव करण्याची जबाबदारी माझी आहे. सध्या गावात होम आयसोलेशनमध्ये असलेल्या रुग्णांवर वैद्यकीय अधिकारी उपचार करत आहेत; पण त्यांना लागणारी औषधे व ड्रायफ्रुट देण्याचे काम मी स्वत: करत आहे. यासाठी रुग्णांना पैसे खर्च करावे लागणार नाहीत. लवकरच गाव कोरोनामुक्त करण्याचा मानस असल्याचे सरपंच सचिन जगदाळे यांनी सांगितले.

फोटो : ११ दुपटे १

ओळी : पद्माळे (ता. मिरज) येथील सरपंच सचिन जगदाळे यांनी रुग्णांच्या नातेवाइकांकडे औषधे पाेहाेच केली.