दादासाहेब ढेरे यांचा काँग्रेसमध्ये प्रवेश

कवठेमहांकाळ : कवठेमहांकाळ तालुक्यातील आर. आर. पाटील यांचे निकटवर्तीय मित्र व राष्ट्रवादी काँग्रेसचे जिल्हा उपाध्यक्ष प्रा. दादासाहेब ढेरे यांनी राष्ट्रवादीला रामराम ठोकत रविवारी काँग्रेसमध्ये प्रवेश केला. रविवारी सांगली येथे कार्यक्रमात काँग्रेसचे प्रदेशाध्यक्ष नाना पटोले यांच्या उपस्थिती त्यांचे पक्षात स्वागत करण्यात आले.

माजी उपमुख्यमंत्री आर. आर. पाटील यांचे निकटवर्तीय व कुशल संघटक म्हणून प्रा. ढेरे हे जिल्ह्यात परिचयाचे आहेत. राजर्षी शाहू विचार मंचचे संस्थापक अध्यक्ष व सांगली जिल्हा राष्ट्रवादी काँग्रेसचे जिल्हा उपाध्यक्ष म्हणून प्रा. दादासाहेब ढेरे हे राजकीय व सामजिक क्षेत्रात कार्यरत होते. मात्र, त्यांनी शेकडो कार्यकर्त्यांसह आता काँग्रेसमध्ये प्रवेश केला आहे.

नाना पटोले म्हणाले की काँग्रेस पक्ष हा बहुजन, मागासवर्गीय, वंचित, उपेक्षित घटकांना न्याय देणारा पक्ष आहे. प्रा ढेरे यांना आपण पक्षात निश्चित न्याय देणार. त्याच्या प्रवेशाने कवठेमहांकाळ तालुक्यात काँग्रेसला बळकटी मिळाली आहे.

प्रा. दादासाहेब ढेरे म्हणाले की काँग्रेस पक्ष हाच खऱ्या अर्थाने वंचित घटकांना न्याय देऊ शकतो. आजपासून आपण कवठेमहांकाळ तालुक्यात काँग्रेस पार्टी जोमाने वाढवू व सोनिया गांधी, राहुल गांधी, प्रियंका गांधी यांचे गावगाड्यातील राजकीय बाहू बळकट करू.

यावेळी आमदार मोहनराव कदम, विशाल पाटील, पृथ्वीराज पाटील, नामदेवराव मोहिते, शैलजाभाभी पाटील, जयश्रीताई पाटील आदी उपस्थित होते.