जतला आंबेडकरांच्या पुतळ्याचे एप्रिलमध्ये लोकार्पण

जत : जत शहरातील डॉ. बाबासाहेब आंबेडकर यांच्या पूर्णाकृती पुतळ्याचे येत्या १४ एप्रिलला लोकार्पण करण्यात येणार आहे. त्यादृष्टीने लवकरात लवकर काम करण्याचा आमचा प्रयत्न राहील, अशी ग्वाही आमदार विक्रम सावंत यांनी दिली.

जत शहरातील मध्यवर्ती भागात डॉ. बाबासाहेब आंबेडकर स्टेडियम परिसरातील बाबासाहेब आंबेडकर यांच्या पूर्णाकृती पुतळ्याच्या जागेवर चबुतरा कामाचा प्रारंभ आमदार विक्रम सावंत यांच्याहस्ते करण्यात आला. यावेळी ते बोलत होते.

ते म्हणाले की, डॉ बाबासाहेब आंबेडकर सन १९३४ मध्ये जत येथे आले होते. त्याची आठवण रहावी व तरुणांना प्रेरणा मिळावी यासाठी पुतळा उभारण्यात येत आहे. याचबरोबर शिवाजी चौकात छत्रपती शिवाजी महाराज व बसवेश्वर चौकात महात्मा बसवेश्वर यांचा पूर्णाकृती पुतळा बसविण्यासाठी आमचा पाठपुरावा सुरू राहणार आहे.

सुनील कसबे यांनी स्वागत व प्रास्ताविक केले. जत नगरपालिका नगराध्यक्षा शुभांगी बन्नेनवार, डॉ. रवींद्र आरळी, नगरसेवक भूपेंद्र कांबळे, संजय कांबळे, अतुल कांबळे, सुजय शिंदे यांनी यावेळी मनोगत व्यक्त केले. यावेळी उपनगराध्यक्ष आप्पासाहेब पवार, तुकाराम माळी, महादेव कोळी, ईराण्णा निडोणी, उत्तम चव्हाण, बसवराज चव्हाण,श्रीकांत शिंदे, आविनाश वाघमारे आदी उपस्थित होते.