जत तालुक्यात लसींची मागणी

माडग्याळ : जत तालुक्यातील लसींचा तुटवडा दूर करून लवकरात लवकर कोरोना लस उपलब्ध करून द्यावी, अशी मागणी सरपंच परिषदेचे जत तालुका अध्यक्ष बसवराज पाटील-एकुंडीकर यांनी केली आहे. याबाबत राज्य लसीकरण अधिकारी, जिल्हाधिकारी, जिल्हा परिषदेचे मुख्य कार्यकारी अधिकारी यांना निवेदन दिले आहे.

निवेदनात म्हटले आहे की, लस उपलब्ध नसल्याने जत तालुक्यातील अनेक केंद्रे बंद करावी लागली. आरोग्य विभागाने केंद्र जाहीर केल्यानंतरही दुसऱ्या दिवसी तिथे लस उपलब्ध नसल्याचे चित्र आहे. पहिली लस घेतलेल्या ज्येष्ठ नागरिकांना यामुळे अडचण निर्माण झाली आहे. इतर राज्यांत लसींचा पुरवठा सुरळीत होत असताना आपल्याकडे नियोजनामध्ये ढिसाळपणा दिसत असून, राज्य सरकार व्यवस्थितपणे नियोजन करून घाबरलेल्या नागरिकांना नियमित लस उपलब्ध करून द्यावी, अशी मागणी बसवराज पाटील यांनी केली आहे.