तासगाव भाजप युवा मोर्चा अध्यक्षपदी दिग्विजय पाटील

तासगावमध्ये उच्चांकी मतांनी प्रभाग क्र ९ चे उमेदवार तसेच लोकनियुक्त नगराध्यक्षांना शहरात सर्वाधिक ९०३ मतांची आघाडी देऊन नगराध्यक्षपदाचा किंगमेकर होण्याची किमया त्यांनी केली आहे. दिग्विजय पाटील विविध सामाजिक उपक्रमांमध्ये अग्रेसर असतात. वृक्षारोपण, रक्तदान शिबिर, एसटी बस थांबा उभारणी, भिलवडी नाका चौक येथे सीसीटीव्ही कॅमेरे बसवणे, गणेशोत्सवातून सामाजिक देखावे, दहीहंडी उत्सवातून युवकांचे संघटन, वयोवृद्धांसाठी विरंगुळा केंद्र, भिलवडी नाका येथे रास्त किमतीमध्ये खासदार शुद्ध पेयजल प्लांटच्या उभारणीसाठी त्यांचा पुढाकार असताे. बॉक्सर ग्रुपच्या माध्यमातून युवकांसाठी अत्याधुनिक व्यायाम शाळा, तसेच स्पर्धा परीक्षा अभ्यासिकेचे काम सुरू आहे. वृक्षदान, शहरात डस्टबिन वितरण, शहरात विविध ठिकाणी नागरिकांना बसण्यासाठी बेंच उपलब्ध करून दिले. भिलवडी आणि सांगली येथील पूरग्रस्त बांधवांना मदत केली.

तासगाव शहरात डास निर्मूलन करण्यासाठी औषध फवारणीसाठी त्यांचा पाठपुरावा असताे. वरचे गल्ली परिसर आणि तासगाव शहरांमध्ये संजयकाकांच्या राजकीय जडणघडणीमध्ये तरुणांमध्ये दिग्विजय पाटील यांचा सिंहाचा वाटा आहे. आपल्या कामातून आणि कृतीतून लोकांच्या मनामध्ये त्यांनी वेगळा ठसा उमटवला आहे.

या कामांची दखल घेत खासदार संजयकाका यांनी भाजप युवा मोर्चाच्या तासगाव तालुकाध्यक्षपदी दिग्विजय पाटील यांची निवड केली आहे. यावेळी युवा मोर्चा जिल्हा अध्यक्ष रोहित पाटील, जिल्हा सरचिटणीस सुंदर पाटील, उदयोजक विनय जिरगे उपस्थित होते.

चौकट :

तालुक्यातील युवकांचे प्रश्न सोडवणार

युवा मोर्चा तालुकाध्यक्ष म्हणून तासगाव तालुक्यातील तरुणांचे संघटन चांगल्या पद्धतीने करणार आहे. नुसतं राजकारणच नाही, तर तरुणांचे सामाजिक क्षेत्रात योगदान वाढावं, त्यांच्या कलागुणांना वाव मिळावा, रोजगार, शैक्षणिक अडचणी यांसह तरुणांच्या सर्व प्रश्नांची सोडवणूक करण्यासाठी पदाचा वापर करणार असल्याची प्रतिक्रिया दिग्विजय पाटील यांनी दिली.

फाेटाे : येणार आहे