सोनवडेत बिबट्याच्या हल्ल्यात शेळी ठार

वारणावती : सोनवडे (ता. शिराळा) येथील बाबरवस्तीमध्ये बिबट्याच्या हल्ल्यात शेळी ठार झाली. गेल्या दहा दिवसांतील ही तिसरी घटना असल्याने ग्रामस्थांतून भीतीचे वातावरण आहे. तातडीने बिबट्याचा बंदोबस्त करावा, अशी मागणी हाेत आहे.

सोनवडे येथील बाबरवस्तीमध्ये शनिवारी पहाटेच्या दरम्यान रंगूबाई रामचंद्र बाबर यांच्या घराजवळील छपरात पाळीव शेळीवर बिबट्याने हल्ला केला. घटनास्थळी बिबट्याचे केस लाकडाला चिकटल्याचे दिसत आहेत. तसेच पायांचे ठसेदेखील उमटलेले आहेत. या घटनेची माहिती मिळताच प्रादेशिक वनविभागाच्या पथकाने घटनास्थळी धाव घेतली. वनक्षेत्रपाल एस. आर. काळे यांच्या आदेशानुसार वनपाल जी. डी. शिंदे यांनी पंचनामा केला. यावेळी सरपंच रवी यादव, उपसरपंच संजय जाधव, युवराज पाटील व ग्रामस्थ उपस्थित होते. वनविभागाने बिबट्याचा बंदोबस्त करावा, अशी मागणी ग्रामस्थांमधून होत आहे.