कौटुंबिक हिंसाचारातून पत्नीनं साथीदाराच्या मदतीनं केली पतीची हत्या

शिरसी येथे अमावस्येच्या रात्री झालेल्या कृष्णात तुकाराम शिंदे ( वय 47 वर्ष ) यांच्या हत्येचा उलघडा करण्यात सांगली पोलिसांना यश आले आहे. त्यांच्या पत्नीने साथीदाराच्या मदतीने पूर्वनियोजित कट रचून हा खून केला असून प्राथमिक तपासात कौटुंबिक हिंसाचारातून हा प्रकार घडल्याचे समोर आले आहे, असे जिल्हा पोलीसप्रमुख दत्तात्रय शिंदे यांनी बुधवारी पत्रकार बैठकीत सांगितले. 

सांगली : शिरसी येथे अमावस्येच्या रात्री झालेल्या कृष्णात तुकाराम शिंदे ( वय 47 वर्ष ) यांच्या हत्येचा उलघडा करण्यात सांगली पोलिसांना यश आले आहे. त्यांच्या पत्नीने साथीदाराच्या मदतीने पूर्वनियोजित कट रचून हा खून केला असून प्राथमिक तपासात कौटुंबिक हिंसाचारातून हा प्रकार घडल्याचे समोर आले आहे, असे जिल्हा पोलीसप्रमुख दत्तात्रय शिंदे यांनी बुधवारी पत्रकार बैठकीत सांगितले. 
याप्रकरणी कृष्णात यांची पत्नी उज्ज्वला शिंदे (वय 27 वर्ष) हिला पोलिसांनी अटक केली आहे. तर तिच्या साथीदाराचे नाव निष्पन्न झाले असून त्यालाही लवकरच ताब्यात घेतले जाईल, असेही शिंदे यांनी सांगितले. शिरसीतील चक्र भैरवनाथ मंदिराच्या गाभा-यात शुक्रवारी मध्यरात्री अमावास्येला कृष्णात शिंदे यांची हत्या करण्यात आली होती. शनिवारी सकाळी ही घटना उघडकीस आली होती. कोल्हापूर परिक्षेत्र विभागाचे विशेष पोलीस महानिरीक्षक विश्वास नांगरे-पाटील, जिल्हा पोलीसप्रमुख दत्तात्रय शिंदे यांनी घटनास्थळी भेट देऊन पाहणी केली होती. मृतदेहाजवळ हळद-कुंकू, टाचण्या व पूजेचे साहित्य पडले होते. यावरुन हा नरबळी असावा, असा संशय होता. मृतदेहाची ओळख पटविण्याचे आव्हान पोलिसांसमोर होते. 

अखेर चार दिवसानंतर मृतदेहाची ओळख पटविण्यात पोलिसांना यश आले. त्यानंतर पोलिसांनी तपासाची चक्रे गतीने फिरवित त्यांच्या कुटुंबापासून चौकशीला सुरूवात केली. अखेर या हत्येत कृष्णात यांच्या पत्नी उज्ज्वला हिला ताब्यात घेण्यात आले.  याबाबत जिल्हा पोलीस प्रमुख शिंदे म्हणाले की, मृतदेहाची ओळख पटविणे व खूनाच्या कारणांचा शोध घेणे हे मोठे आव्हान होते. पण पोलिसांनी योग्य दिशेने तपास करून खूनाचा उलघडा केला आहे. कृष्णात यांच्या पत्नीने पूर्वनियोजित कट रचून हा खून केला. या खूनामागे कौटुंबिक हिंसाचाराचे कारण प्राथमिक तपासास समोर आले आहे. कृष्णात हा पत्नी उज्ज्वला हिच्या चारित्र्यावर संशय घेत होता. त्यातून दोघांत सतत भांडण होत असे. गणेशोत्सवापासून ती माहेरी भिलवडी (तालुका पलूस) येथे रहात होती. या छळाला कंटाळून तिने एका साथीदाराच्या मदतीने कृष्णात याचा काटा काढण्याचा निर्णय घेतला. खूनापूर्वी महिनाभर तिची तयारी सुरू होती. १६ नोव्हेंबर रोजी उज्ज्वला व तिच्या साथीदारात चर्चा झाली. दुस-यादिवशी १७ रोजी दुपारी कृष्णात याला अंकलखोप येथे बोलावून घेण्यात आले. तिथे उज्ज्वला व तिच्या साथीदाराने त्यांना दोघांत भांडणे होतात, ते थांबविण्यासाठी देवाला जाऊ, असे सांगून कृष्णात याला मोटारसायकलीवरून शिरसीत आणण्यात आले. मध्यरात्रीच्या सुमारात चक्रभैरव मंदिरात त्यांच्या डोक्यात दगड, विट घालून खून करण्यात आला. याप्रकरणी चौकशीतून साथीदाराचे नाव निष्पन्न झाले असून त्यालाही लवकरच ताब्यात घेतले जाईल, असेही शिंदे यांनी स्पष्ट केले. 
 
नरबळीचा प्रकार नाही : शिंदे
अमावस्येच्या रात्री मंदिरात अनोळखी व्यक्ती खून करण्यात आला. मृतदेहाशेजारी लिंबू, कुंकु व इतर साहित्य असल्याने नरबळीचा संशय व्यक्त होत होता. पोलिसांनी ती शक्यता गृहीत धरून तपास केला. शिरसी गावातील ग्रामस्थांशी चर्चा केली. मंदिराचे बांधकाम केलेल्या दत्ता माळी यांच्याशी चर्चा झाली. चक्रभैरव मंदिरातील भैरवनाथ हे महादेवाचा अवतार असल्याचे गावकरी मानतात. मंदिरात गोड नैवैद्य असतो. श्रावण महिन्यात भैरवनाथाची पालखीही निघते. आजूबाजूच्या आठ ते दहा गावातील लोक दर्शनासाठी येतात. या मंदिरात पशुंची बळी देण्याची प्रथा नाही. त्यातूनच नरबळीचा हा प्रकार नसल्याचे स्पष्ट झाले होते. आता खूनाचा उलघडाही झाला असून हा खून कौटूंबिक हिंसाचारातून झाल्याचे उघड झाले आहे, असे जिल्हा पोलिस प्रमुख शिंदे यांनी स्पष्ट केले. 
 
बस तिकिटामुळे ओळख पटली
मृत कृष्णात यांच्या खिशात पाचवा मैल ते अंकलखोपपर्यंतचे एसटी बसचे तिकीट सापडले होते. या तिकीटावरून मृत व्यक्ती पाचवा मैल, पलूस परिसरातील असावा, अशी शक्यता गृहित धरून तपास सुरू केला. अखेर मृत व्यक्ती कुंडल येथील असल्याचे उघड होऊन ओळख पटली. 
 
पथकाला बक्षीस
शिरसी येथील मंदिरात झालेल्या खूनाची ओळख पटविण्याचे पोलिसांसमोर आव्हान होते. जिल्हा पोलिस प्रमुख दत्तात्रय शिंदे यांनी माहिती देणा-यास २५ हजार रुपयांचे बक्षीस जाहीर केले होते. पण पोलिस उपअधिक्षक किशोर काळे यांच्या नेतृत्वाखालील पथकाने या खूनाचा उलघडा केल्याने आता हे बक्षीस पोलिस पथकाला दिले जाईल, असेही शिंदे यांनी जाहीर केले.