कुपवाडमध्ये किरकोळ कारणावरून एकास घरात घुसून मारहाण

कुपवाड : शहरात किरकोळ कारणावरुन झालेल्या भांडणाचा राग मनात धरून शुक्रवारी सकाळी सहा तरूणांच्या टोळक्याने एकास घरात घुसून दगड व काठीने बेदम मारहाण केेेली. या हल्ल्यात आशपाक खलील नदाफ (वय २१, रा. शांत कॉलनी, कुपवाड) हा तरूण जखमी झाला आहे. पोलिसांनी संशयितांना अटक केली आहे.

अटक केलेल्यांमध्ये सागर मच्छिंद्र व्हनकंडे (२७, रा. बामणोली), अक्षय सिद्धेश्वर थोरात (२४, रा. अवधूत कॉलनी, कुपवाड), अमोल आण्णासाहेब निकम (२४, रा. धनगरगल्ली, कुपवाड), दिग्विजय सुभाष चिंचकर (२५), दिनेश सुभाष चिंचकर (२४) व सागर एकनाथ शेंडगे (३५, सर्व रा. बामणोली) यांचा समावेश आहे.

फिर्यादी व संशयित सागर व्हनकंडे यांच्यात किरकोळ कारणावरून भांडण झाले होते. या भांडणाचा राग मनात धरुन शुक्रवारी सकाळी साडेअकरा वाजता सागर व्हनकंडे, अक्षय थोरात, अमोल बापट, दिग्विजय चिंचकर, दिनेश चिंचकर व सागर शेंडगे असे सर्वजण एकत्र दुचाकीवरुन फिर्यादीच्या कापसे प्लाॅट येथील मावशीच्या घरात घुसले. तेथे काठीने व दगडाने नदाफ याला मारहाण करुन जखमी केले. शिवीगाळ करून जीवे मारण्याची धमकी दिली. पोलिसांनी सहा संशयितांना अटक केली आहे. उपनिरीक्षक राजू अन्नछत्रे तपास करीत आहेत.