जिल्ह्यात पाच महिन्यांनंतर नीचांकी रुग्णांची नोंद

सांगली : जिल्ह्यात कोरोना रुग्णांच्या संख्येत सातत्याने घट होत आहे. मंगळवारी दिवसभरात १२ नवे रुग्ण आढळून आले असून, गेल्या पाच महिन्यांतील नीचांकी रुग्णांची नोंद झाली आहे. दरम्यान, दिवसभरात एकाचा मृत्यू झाला, तर ४१ जणांनी कोरोनावर मात केली आहे.

महापालिका क्षेत्रात मंग‌ळवारी मिरजेत एका रुग्णाची नोंद झाली. आटपाडी, तासगाव, मिरज व शिराळा तालुक्यात प्रत्येकी १, जत तालुक्यात ३, तर खानापूर तालुक्यात ४ रुग्ण आढळून आले. पलूस, कडेगाव, वाळवा व कवठेमहांकाळ तालुक्यात एकही रुग्ण आढळून आला नाही. दरम्यान, खानापूर तालुक्यातील एका रुग्णाचा उपचारादरम्यान मृत्यू झाला.

दिवसभरात आरटीपीसीआरच्या १७३ चाचण्या करण्यात आल्या. त्यात ५ पाॅझिटिव्ह रुग्ण आढळून आले. अँटिजेनच्या १३२७ चाचण्यांत ८ रुग्ण सापडले. सध्या ५९ जणांची प्रकृती चिंताजनक आहे. यात ऑक्सिजनवर ४५, हाय फ्लो नेझल ऑक्सिजनवर ७, तर नाॅन इन्व्हेजीव व्हेंटिलेटरवर ७ रुग्ण आहेत. सध्या जिल्ह्यातील ३०७ व परजिल्ह्यातील १० जणांवर उपचार सुरू आहेत. कोल्हापूर जिल्ह्यातील एक रुग्ण उपचारासाठी दाखल झाला आहे, तर कर्नाटकातील एक रुग्णाचा मृत्यू झाला आहे.

चौकट

मंगळवारी दिवसभरात...

आजचे रुग्ण : १२

उपचाराखालील रुग्ण : ३०७

आजअखेर बरे झालेले रुग्ण : ४५,२५०

मृत्यू : १७२३

आजअखेरचे एकूण रुग्ण : ४७२८०

चिंताजनक : ५९