मिरजेत जबरी चोऱ्या करणाऱ्याला अटक

लोकमत न्यूज नेटवर्क

सांगली : मिरज शहरात वाटसरुंना अडवून लुटणाऱ्या चोरट्याला स्थानिक गुन्हे अन्वेषण शाखेच्या पथकाने अटक केली आहे. सुरज विलास साठे (वय २२, रा. शास्त्री चौक, मिरज) असे संशयिताचे नाव असून, त्याच्याकडून १५ हजार रुपये किमतीचा चोरलेला मोबाईल जप्त करण्यात आला आहे.

पोलीस अधीक्षक दीक्षित गेडाम यांनी मिरज परिसरातील गुन्हेगारांवर कडक कारवाईचे आदेश दिले आहेत. त्यानुसार एलसीबीचे पथक मिरजेत गस्तीवर असताना, शहरातील शास्त्री चौकात एकजण संशयास्पद स्थितीत उभा असल्याची माहिती मिळाली. त्यानुसार पथकाने सापळा लावून त्याला ताब्यात घेत चौकशी केली. त्यात त्याने एक महिन्यापूर्वी कृष्णा घाट रोडवर एका वाटसरुला अडवून त्याच्याकडून मोबाईल काढून घेतल्याची माहिती दिली. तसेच पाच दिवसांपूर्वी मिरज बसस्थानकाजवळ रात्रीच्यावेळी एका रिक्षाचालकाला अडवून त्याच्या खिशातील पैसे काढून घेत असताना त्याने अडविल्याने त्याच्या गळ्यावर व हातावर वार करुन त्याच्या खिशातील सहाशे रुपये काढून घेतल्याचे सांगितले. महात्मा गांधी चौक पोलीस ठाण्यात या दोन्ही गुन्ह्यांची नोंद असल्याची माहिती मिळाली.

पोलीस निरीक्षक सर्जेराव गायकवाड यांच्या मार्गदर्शनाखाली उपनिरीक्षक अभिजित सावंत, संजय कांबळे, सुधीर गोरे, शशिकांत जाधव आदींच्या पथकाने ही कारवाई केली.