आई की वैरी..प्रियकराच्या साथीने केला पोटच्या मुलाचा खून

पोटच्या मुलाचा खून करून मृतदेहावर परस्पर केले अंत्यसंस्कार.

आष्टा : पत्नीने प्रियकराच्या मदतीने पोटच्या मुलाचा खून करून मृतदेहावर परस्पर अंत्यसंस्कार केल्याची फिर्याद सुशांत सुधीर वाजे (रा. वाळवा) यांनी बुधवारी रात्री आष्टा पोलिसांत दिली. मनन सुशांत वाजे (वय साडेतीन वर्षे) असे मृत मुलाचे नाव असून, याप्रकरणी प्राची सुशांत वाजे व तिचा प्रियकर अमरसिंह विश्वासराव पाटील (रा. बिळाशी, ता. शिराळा, सध्या रा. मुंबई) यांच्यावर गुन्हा दाखल करण्यात आला आहे.

याबाबत आष्टा पोलिसांकडून मिळालेली माहिती अशी, वाळव्यातील सुशांत वाजे यांचा प्राची हिच्याशी विवाह झाला असून, त्यांना मनन हा साडेतीन वर्षांचा मुलगा आहे. प्राचीचे अमरसिंह पाटीलसोबत अनैतिक संबंध आहेत. अमरसिंह पाटील मूळचा बिळाशी येथील असून, सध्या पश्चिम परेल (मुंबई) येथे वास्तव्यास आहे. अमरसिंह पाटीलने ऑगस्टमध्ये प्राचीला फूस लावून मुलगा मननसह पळवून नेले. अनैतिक संबंधासाठी तिला परेल येथील स्वत:च्या घरी ठेवले. ऑगस्ट ते ६ ऑक्टोबरदरम्यान प्राची व अमरसिंह हे दोघेही अनैतिक संबंधात अडथळा ठरतो म्हणून मनन यास मारहाण करून त्याचा छळ करत होते.

दि. ६ ऑक्टोबररोजी प्राची व अमरसिंहने मननचा खून केला. त्याच्या मृतदेहाची विल्हेवाट लावण्यासाठी मुंबईतून अमरसिंहच्या मोटारीतून (क्रमांक एमएच १३ एडी ८०) तो बिळाशी येथे आणण्यात आला. मननच्या मृत्यूबाबत सुशांत वाजे यांना कोणतीही माहिती न देता वाकुर्डे बुद्रूक (ता. शिराळा) येथे मननवर अंत्यसंस्कार केले. मननच्या मृतदेहाची परस्पर विल्हेवाट लावण्यात आली. मननचा मृत्यू मुंबईत झाला असताना अमरसिंह व प्राची यांनी बिळाशीच्या ग्रामसेवकाकडे सादर केलेल्या प्रतिज्ञापत्रात मृत्यू बिळाशीत झाल्याची खोटी माहिती दिली आहे.

याबाबत सर्व माहिती मिळाल्यानंतर सुशांत वाजे यांनी बुधवारी रात्री आष्टा पोलिसांत फिर्याद दिली. पोलीस निरीक्षक अजित सिद अधिक तपास करत आहेत.