आरटीओ एजंटाचा खून, पत्नीवरही हल्ला करुन हल्लेखोर पसार; मिरजेतील हरीपूर येथील घटना

हरिपूर रोडवरील गजानन कॉलनीजवळ हा प्रकार घडला. सांगली ग्रामीण पोलिसांत याची नोंद झाली आहे.

सांगली : हरीपूर (ता. मिरज) येथे आरटीओ एजंट म्हणून काम करणाऱ्या सुरेश नांद्रेकर (वय ४७) याचा तिघांनी खून केला. सोमवारी रात्री ही घटना घडली. पतीस वाचविण्यासाठी गेलेल्या पत्नीवरही हल्लेखोरांनी हल्ला चढविला त्यामध्ये पत्नीही गंभीर जखमी झाली आहे. हरिपूर रोडवरील गजानन कॉलनीजवळ हा प्रकार घडला. सांगली ग्रामीण पोलिसांत याची नोंद झाली आहे.

पोलिसांनी दिलेली माहिती अशी की, सुरेश नांद्रेकर आणि त्याच्या पत्नी संकष्टी सोडण्यापूर्वी बागेतील गणपतीचे दर्शन घेण्यासाठी दुचाकीवरून गेले होते. दर्शन घेवून घरी परत येत असताना त्यांच्या घराजवळच तिघे हल्लेखोर दबा धरून बसले होते. या तिघा हल्लेखोरांनी दुचाकीच्या शॉकप्सरने सुरेश यांच्या डोक्यावर वार केला. त्यामध्ये ते गंभीर जखमी झाले.

त्यांना वाचविण्यासाठी गेलेल्या पत्नीवरही हल्लेखोरांनी हल्ला केला. हल्ल्यानंतर हे तिघे हल्लेखोर पळून गेले. त्यानंतर आजूबाजूच्या नागरिकांनी जखमी दाम्पत्याला वसंतदादा सर्वोपचार रूग्णालयात उपचारासाठी दाखल केले. मंगळवारी पहाटे सुरेश नांद्रेकरांचा उपचारादरम्यान मृत्यू झाला तर पत्नीवर उपचार सुरू आहेत.