जतजवळ सराफास मारहाण करून लुबाडले

जत : सनमडी (ता. जत) येथील सराफ व्यावसायिक सिद्धू महादेव सलगर (वय ३०) यांची दुचाकी मोटरसायकल अडवून त्यांना लोखंडी रॉड व काठीने बेदम मारहाण केली. तसेच त्यांच्याजवळील रोख ५० हजार रुपये व हातातील २० ग्रॅम वजनाच्या दोन सोन्याच्या अंगठ्या असा सुमारास एक लाख ५० हजार रुपयांचा मुद्देमाल राम पवार व इतर दोन ते तीन अज्ञात चोरट्यांनी लंपास केला आहे. ही घटना बुधवारी दुपारी घडली.

जतपासून एक किलोमीटर अंतरावरील आबासो पार्क येथे घडली आहे. याप्रकरणी सिद्धू सलगर यांनी गुरुवारी सायंकाळी जत पोलिसांत फिर्याद दाखल केली आहे.

याबाबत अधिक माहिती अशी की, सिद्धू सलगर हे हिरो होंडा दुचाकी मोटारसायकल क्रमांक एमएच-१० / १४२४ वरून सनमडी ते जत येत होते. त्यांची दुचाकी मोटारसायकल आबासो पार्क (जत) जवळपास आल्यानंतर राम पवार व इतर अज्ञात दोन तीन जणांनी मोटरसायकल अडवून त्यांना लोखंडी रॉड व काठीने बेदम मारहाण करण्यास सुरुवात केली. त्यानंतर ते आरडाओरडा करत असताना त्यांच्या खिशात असलेले रोख ५० हजार रुपये व हातातील दहा ग्रॅम वजनाच्या दोन सोन्याच्या अंगठ्या हिसकावून घेण्यात आल्या आहेत. सदरची घटना घडल्यानंतर त्यांनी दवाखान्यात प्राथमिक उपचार करून घेऊन गुरुवारी सायंकाळी उशिरा जत पोलिसांत फिर्याद दाखल केली आहे. या प्रकरणाचा पुढील तपास पोलीस उपनिरीक्षक युवराज घोडके करत आहेत.