सांगलीत दोन दुचाकीच्या धडकेत वृद्ध ठार

शहरातील कोल्हापूर रस्त्यावर दोन दुचाकींची समोरासमोर धडक होऊन झालेल्या अपघातात वृध्दाचा जागीच मृत्यू झाला.

लोकमत न्यूज नेटवर्क, शरद जाधव, सांगली : शहरातील कोल्हापूर रस्त्यावर दोन दुचाकींची समोरासमोर धडक होऊन झालेल्या अपघातात वृध्दाचा जागीच मृत्यू झाला. माधव लक्ष्मण जोशी (वय ८० रा. रुक्मिणीनगर, सांगली) असे मृत वृद्धाचे नाव आहे. तर दुसऱ्या दुचाकीवरील बसवराज जिनाप्पा कावळे (वय २३ रा. कर्नाटक) हा जखमी झाला असून त्याला उपचारासाठी रुग्णालयात दाखल करण्यात आले आहे. सांगली शहर पोलिस ठाण्यात अपघाताची नोंद आहे.

पोलिसांनी दिलेली माहिती अशी की, शहरातील रूक्मीणीनगर परिसरात मृत माधव जोशी हे एकटेच राहण्यास होते. मुंबईतील शिपयार्डमधील नोकरीतून निवृत्त झाल्यानंतर ते सांगलीत राहण्यास आले होते. शनिवारी दुपारी बाराच्या सुमारास ते मोपेडवरून सांगलीकडे येत होते. याचवेळी दुसरा दुचाकीस्वार बसवराज कावळे हा त्याच्या दुचाकीवरून कोल्हापूरच्या दिशेने भरधाव वेगात जात होता. कोल्हापूर रस्त्यावर हॉटेल उदय डिलक्ससमोर दोन्ही वाहनांची धडक झाली. 

यात रस्त्यावर पडल्याने जोशी यांच्या डोक्याला गंभीर दुखापत झाली व अतिरक्तस्त्रावामुळे त्यांचा जागीच मृत्यू झाला. जखमी कावळे याने हेल्मेट घातले असल्याने तो किरकोळ जखमी झाला. घटनेची माहिती मिळताच सांगली शहर पोलिसांनी घटनास्थळी धाव घेत पंचनामा केला. व उत्तरीय तपासणीसाठी मृतदेह शासकीय रूग्णालयात हलविला. रात्री उशिरा शहर पोलिसात घटनेची नोंद झाली.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"