वळसंगमध्ये एकावर कुऱ्हाडीने हल्ला

जत : वळसंग (ता. जत) येथे शेतातील सामाईक विहिरीतून पाणी घेण्याच्या कारणातून गौडाप्पा नामदेव बंडगर (वय ३०, रा. वळसंग) यांच्यावर कुऱ्हाडीने हल्ला करून त्यांना गंभीर जखमी केल्याच्या आरोपावरून पोलिसांनी विजय सुखदेव बंडगर व संजय सुखदेव बंडगर (दोघे रा. वळसंग, ता. जत) यांच्याविरोधात गुन्हा दाखल केला आहे. ही घटना २४ डिसेंबर रोजी रात्री घडली.

याबाबत अद्याप कोणासही अटक करण्यात आली नाही. या प्रकरणी गौडाप्पा बंडगर यांनी फिर्याद दिली आहे. यापूर्वी गौडाप्पा विजय यांच्यात झालेली भांडणे आपापसांत मिटविण्यात आली होती; परंतु पुन्हा त्याच कारणावरून त्यांच्यात वाद होऊन वरील दोघांनी गौडाप्पा बंडगर यांना कुऱ्हाडीने हल्ला करून गंभीर जखमी केले आहे. उपचारानंतर शुक्रवारी रात्री उशिरा त्यांनी जत पोलीस ठाण्यात फिर्याद दिली आहे. या प्रकरणाचा पुढील तपास पोलीस उपनिरीक्षक आप्पासाहेब कत्ती करीत आहेत.