कामेरी येथे एकास जबर मारहाण

इस्लामपूर : कामेरी (ता. वाळवा) येथे एकाने शिवीगाळ केल्याचा जाब विचारल्याने त्याला मारहाण करून गंभीर जखमी करण्यात आले. ही घटना शनिवारी दुपारी ४.३० च्या सुमारास घडली. जखमीवर सांगलीच्या शासकीय रुग्णालयात उपचार सुरू आहेत. याबाबत जखमी रणजित आकाराम कुंभार (३४) यांनी रविवारी पोलिसांत फिर्याद दिली. त्यावरून विशाल उत्तम जाधव याच्याविरुद्ध गंभीर मारहाणीचा गुन्हा नोंद करण्यात आला आहे.

रणजित आणि विशाल एकाच गल्लीत राहतात. विशाल हा दारू पिऊन रणजित आणि त्याच्या पत्नीला शिवीगाळ करतो. शनिवारी दुपारी रणजित त्याला जाब विचारण्यासाठी गेला होता. त्यावेळी विशाल याने दांडक्याने त्याच्या नाकावर, डोक्यात आणि अंगावर मारहाण करत त्याला रक्तबंबाळ केले. रणजितच्या घरच्यांनी हे भांडण सोडवत त्याला शासकीय रुग्णवाहिकेतून सांगली येथील रुग्णालयात दाखल केले.