पेठनाका येथे ट्रकच्या धडकेत एक ठार

इस्लामपूर : पेठनाका (ता. वाळवा) येथील जुन्या मणिकंडण हॉटेलच्या पार्किंगमध्ये मालट्रकच्या धडकेत एकजण जागीच ठार झाला. ही घटना बुधवारी रात्री नऊच्या सुमारास घडली. याप्रकरणी अज्ञात वाहनचालकाविरुद्ध गुन्हा नोंद करण्यात आला आहे.

मिलिंद सदाशिव पाटील (वय ४३, रा. इनाम मळा, पेठ) असे मृताचे नाव आहे.

याबाबत सूरज जयंत पाटील याने पोलिसात फिर्याद दिली आहे. बुधवारी रात्री नऊच्या सुमारात मिलिंद पाटील हॉटेल पार्किंगच्या आवारात रिक्षा लावून दगडी कट्ट्याजवळ उभे होते. यावेळी तेथे असलेल्या मालट्रकच्या चालकाने पाठीमागे न बघता निष्काळजीपणे ट्रक मागे घेताना पाटील यांना धडक दिली. या धडकेत ट्रकचे चाक पाटील यांच्या डोक्यावरून गेल्याने ते जागीच ठार झाले. या घटनेने भयभीत झालेल्या ट्रकचालकाने तेथून वाहनासह पलायन केले. पोलीस उपनिरीक्षक डी. पी. शेडगे अधिक तपास करीत आहेत.

फोटो - २४१२२०२०-आयएसएलएम- मिलिंद पाटील