राष्ट्रीय महामार्गाजवळ पेठ हद्दीत वाहनाच्या धडकेत एकाचा मृत्यू

इस्लामपूर : पुणे-बेंगलोर राष्ट्रीय महामार्गावर पेठ गावच्या हद्दीतील पाटील मळ्याजवळ पाठीमागून आलेल्या अज्ञात वाहनाने दुचाकीला धडक दिल्याने एकाचा मृत्यू झाला. हा अपघात मागील महिन्यात ६ फेब्रुवारीच्या रात्री ११ वाजता घडला. पतीच्या मृत्यूची माहिती मिळाल्यावर मानसिक धक्का बसलेल्या पत्नीने औषधोपचार घेऊन बरे झाल्यानंतर आज पोलिसात फिर्याद दिली.

सरिता सागर उकीरे (वय ३१, रा. पट्टणकोडोली, ता. हातकणंगले) यांनी फिर्याद दिली आहे. या अपघातात सागर महादेव उकीरे (३५) यांचा मृत्यू झाला आहे. पोलिसांनी अज्ञात चालकाविरुद्ध, अपघात करून मृत्यूस कारणीभूत ठरल्याचा गुन्हा नोंद केला आहे.

सागर उकीरे यांनी जानेवारी महिन्यात कऱ्हाड तालुक्यातील तासवडे येथे हॉटेल चालविण्यासाठी घेतले होते. चार-पाच दिवसांनी ते पट्टणकोडोली येथील घरी येत असत. ६ फेब्रुवारी रोजी दुचाकीवरून (क्र. एमएच ०३ एडी ६९४९) ते कोल्हापूरच्या दिशेने निघाले होते. त्यावेळी पेठ हद्दीतील पाटील मळ्याजवळ त्यांना पाठीमागून आलेल्या वाहनाने धडक दिली. या धडकेमुळे सागर उकीरे हे त्यांच्या समोरील वाहनावर जाऊन आदळले. त्यातच त्यांचा मृत्यू झाला. हवालदार तुषार देवळेकर अधिक तपास करीत आहेत.