मिरजेत एसटीत चढताना चोरलेले महिलांचे साडेआठ तोळे दागिने पोलिसांकडून परत

मिरजेत दोन महिन्यांपूर्वी बसस्थानकातून चोरट्यांनी चोरून नेलेले सुमारे साडेआठ तोळ्यांचे दागिने पोलिसांनी हस्तगत केले. तीन महिलांचे हे दागिने संबंधितांना परत देण्यात आले. गांधी चौक पोलिसांनी चोरी करणाऱ्या आरोपींना पकडून चोरीचा मुद्देमाल परत केल्याने महिलांनी समाधान व्यक्त केले.

शहरातील एसटी स्थानकावर कोल्हापूर एसटीत चढताना पद्मश्री श्रीमंत वाडकर (रा. उचगाव, ता. करवीर), पद्मश्री विजयकुमार पाटील (रा. मु. पो. किणी, ता. हातकणंगले), उज्ज्वला पिराजी पाटील (रा. ब्राह्मणपुरी मिरज) या महिला प्रवाशांच्या बॅगेतील साडेआठ तोळ्यांचे दागिने चोरट्यांनी लंपास केले होते. याबाबत फिर्याद दाखल झाल्यानंतर गांधी चौक पोलिसांनी संतोष टिल्या भोसले आणि वैशाली संदीप काळे (दोघे रा. तालखेड, ता. माजगाव, जि. बीड) या दोघा चोरट्यांना पकडून त्यांच्याकडून चोरीस गेलेले दागिने हस्तगत केले. सहाययक निरीक्षक प्रवीणकुमार कांबळे यांनी महिलांना बोलावून दागिने परत केले.