प्रकाश जमदाडे नवीन वर्षात राष्ट्रवादीत

जत : जत तालुक्यातील भाजपचे कार्यकर्ते व सांगली कृषी उत्पन्न बाजार समितीचे माजी सभापती प्रकाश जमदाडे यांनी भाजपशी काडीमोड घेऊन राष्ट्रवादीत प्रवेशाचा निर्णय घेतला आहे. नवीन वर्षाच्या सुरुवातीस नवीन पक्षात प्रवेश करणार असल्याचे त्यांनी गुरुवारी ‘लोकमत’च्या प्रतिनिधीला सांगितले.

राष्ट्रवादीचे प्रदेशाध्यक्ष तथा पालकमंत्री जयंत पाटील जत दौऱ्यावर आले होते. त्यांच्या वाहनातून प्रकाश जमदाडे, जनसुराज्य पक्षाचे नेते बसवराज पाटील, पंचायत समितीचे माजी सभापती मन्सूर खतीब यांनी एकत्रित प्रवास केला. यावेळी पक्ष प्रवेशाबाबत चर्चा झाल्याचे समजते; परंतु या चर्चेला अधिकृत दुजोरा मिळू शकला नाही. यासंदर्भात बसवराज पाटील व मन्सूर खतीब यांनी मात्र राष्ट्रवादीत प्रवेश करणार नसल्याचे सांगितले.

प्रकाश जमदाडे यांच्याशी संपर्क साधला असता ते म्हणाले की, मी जानेवारीमध्ये राष्ट्रवादीत प्रवेश करणार आहे. जयंत पाटील यांच्यासमवेत सकारात्मक चर्चा झाली आहे.

जयंत पाटील हे कीर्तीमालिनीराजे डफळे यांच्या निधनानंतर त्यांच्या कुटुंबीयांची भेट घेण्यासाठी गेले होते. तेथून ते राजारामबापू साखर कारखान्याच्या तिप्पेहळ्ळी युनिटकडे गेले. यादरम्यान त्यांच्यासोबत बसवराज पाटील, मन्सूर खतीब, प्रकाश जमदाडे वाहनात होते.